گه‌رمیان: ته‌نها دوو قوتابخانه ئاواره‌ی تێدایه
2 / 9 / 2014
ئه‌مڕۆ (2ی ئه‌یلول) له‌میانی كردنه‌وه‌ی قوتابخانه‌یه‌كی 18 پۆلی له شاری كه‌لار به ئاماده‌بوونی سه‌رپه‌رشتیاری ئیداره‌ی گه‌رمیان، به‌ڕێوه‌به‌ری گشتی په‌روه‌رده‌ی گه‌رمیان ئاشكرایكرد، له سنوری ئیداره‌ی گه‌رمیان ته‌نها دوو بینای قوتابخانه له‌سنوری گه‌رمیان ئاواره‌ی تێدا نیشته‌جێیه.
دارا ئه‌حمه‌د به‌رێوه‌به‌ری گشتی په‌روه‌رده‌ی گه‌رمیان به‌سایتی (ئیداره‌ی گه‌رمیان)ی راگه‌یاند: ئه‌م خوێندنگه 18 پۆلییه به بودجه‌ی یه‌ك ملیار و 271 ملیۆن جێبه‌جێكراوه و هۆڵی گه‌وره و كافتریا و سێ تاقیگه‌ی وانه‌كانی فیزیا و كیمیا و زینده‌وه‌رزانی تێدایه و بڕیاره دوو ده‌وامی ئاماده‌یی و بنه‌ڕه‌تی تێدا بكرێت.
ده‌رباره‌ی ئاماده‌كاری بۆ ساڵی نوێی خوێندن و كێشه‌ی بینای قوتابخانه و خوێندنگه له گه‌رمیان، دارا ئه‌حمه‌د ووتی "ئاماده‌كارییه‌كان به باشی به‌ڕێوه‌ده‌چن و له سنوری هه‌موو ئیداره‌ی گه‌رمیاندا حه‌وت قوتابخانه ماوه سێ ده‌وامی بێت له داهاتووشدا ئه‌و كێشه‌یه چاره‌سه‌رده‌كرێت".
به‌ڕێوه‌به‌ری گشتی په‌روه‌رده‌ی گه‌رمیان ئاماژه‌ی به‌وه‌شكرد، له سنوری ئیداره‌ی گه‌رمیاندا ته‌نها دوو قوتابخانه له ناحیه‌كانی كۆكس و قۆره‌توو ئاواره‌ی تێدا نیشته‌جێیه، تا ده‌تستپێكردنی ساڵی نوێی خوێندن هه‌وڵ ده‌ده‌ن ئه‌و كێشه چاره‌سه‌ر بكه‌ن و ده‌وامی ئاسایی له‌و دوو قوتابخانه‌یه‌ش بكرێت.
| 250 جار خوێندراوه‌ته‌وه |
|
|
|