له‌ماوه‌ی مانگی ئابی ئه‌مساڵدا، له‌سنووری ئیداره‌ی گه‌رمیان، له‌لایه‌ن لیژنه‌كانی چاودێری بازرگانی گه‌رمیانه‌وه‌ له‌ ئه‌نجامی پشكنینی زیاتر له‌ 700 شوێنكار، نزیكه‌ی 50 شوێنكار غه‌رامه‌كراون و له‌به‌رامبه‌ریشدا زیاتر له‌ 100 شوێنكاریش خۆراكی به‌سه‌رچوویان ڕاده‌ستی لیژنه‌كان كردووه‌.

حیكمه‌ت ئه‌حمه‌د، به‌ڕێوه‌به‌ری چاودێری بازرگانی گه‌رمیان به‌ سایتی ( ئیداره‌ی گه‌رمیان )ی راگه‌یاند: له‌ماوه‌ی مانگی ئابدا و له‌سنووری ئیداره‌ی گه‌رمیان پشكنین بۆ 779 شوێنكار كراوه‌ و  به‌هۆی بوونی خۆراكی خراپ و ماوه‌ به‌سه‌رچووه‌وه‌ 32 فرۆشیار غه‌رامه‌كراون و به‌هۆی ئه‌وه‌ی نرخی كاڵا و شمه‌كه‌كانیان لێكردبووه‌وه‌ 17 فرۆشیاری تر غه‌رامه‌كراون.

به‌ڕێوه‌به‌ری چاودێری بازرگانی گه‌رمیان وتیشی"هه‌ر له‌و ماوه‌یه‌دا 113 فرۆشیار خۆیان خۆراكی خراپ و ماوه‌ به‌سه‌رچوویان ڕاده‌ستی لیژنه‌كانی به‌ڕێوه‌به‌رایه‌تیان كردووه‌ كه‌ ده‌كاته‌ زیاتر له‌ دوو ئه‌وه‌نده‌ی سه‌رپێچیكاران".

حیكمه‌ت ئه‌حمه‌د ئاماژه‌ی به‌وه‌شدا، هه‌ر له‌ماوه‌ی مانگی ڕابردوودا ده‌ست به‌سه‌ر نزیكه‌ی یه‌ك تۆن و نیو خۆراكی خراپ و ماوه‌به‌سه‌رچوو له‌گه‌ڵ دوو تۆن و نیو سه‌وزه‌ و میوه‌ی خراپ بوودا گیراوه‌.

راشیگه‌یاند: كۆی بڕی ئه‌و پاره‌یه‌ی له‌ سه‌رپێچیكاران وه‌رگیراوه‌ بریتی یه‌ له‌ دوو ملیۆن و 110 هه‌زار دینار.