بەمەبەستی دابینكردنی پێداویستیەكانی لیژنە هاوبەشەكانی قایمقاميەتی قەزای كەلار بۆ چاودێركردنی و پشكنین و نرخی ئەو شتومەكانەی لە بازارەكاندا هەن ئەمرۆ (30ی ئەیلول ) سەرپەرشتیاری ئیدارەی گەرمیان لەگەڵ قایمقامی قەزای كەلار و سەرجەم لایەنە پەیوەندیدارەكاندا كۆبوویەوە.

لەسەرەتای كۆبوونەوەكەدا كە لە دیوانی ئیدارەی گەرمیان بەرێوەچوو سەڵاح كوێخا سەرپەرشتیاری ئیدارەی گەرمیان وێرای دەست خۆشی لە لیژنە هاوبەشەكانی قایمقاميەت رایگەیاند: لە ئێستادا بە هۆی ئەو قەیران و كەم و كورتیانەی كە رووی لە هەرێمی كوردستان كردووە لە رووی بودجە و پێداویستی بنەرەتیەكان بە تایبەتی نەبوونی بەنزین و ئۆتۆمبیل، لیژنەكانی بە تەواوی نەیتوانیوە ئەركەكانی خۆی جێبەجي بكات.

راشیگەیاند:لە ئێستادا ئیدارەی گەرمیان بە هەموو شێوەیەك هەماهەنگی و هاوكاری تەواوی لیژنەكە دەكات لەسەرجەم پێداویستیە بنەرەتیەكاندا، ئەمەش لەپێناو پاراستنی تەندروستی هاوڵاتیان و رێگری كردن لە خواردن و مەوادی بەسەرچوو زیان بەخش. بۆ ئەوەی بتوانن بە شێوەیەكی كارا چاودێری و مۆلەت و نرخ و پاك خاوێنی و تەندروستی بازار و شوێنە گشتیەكان بكەن.

پاشان لە كۆبوونەوەكەدا جەلال نوری قایمقامی قەزای كەلار ئەوەی خستەروو ، لیژنە هاوبەشەكانی قایمقاميەتی قەزای كەلار كە لە فەرمانبەرانی لایەنە پەیوەندارەكان كە لە بەرێوەبەرایەتی تەندروستی و ڤێتەنەری و ئاسایشی و بازرگانی گەرمیان پێك هاتوون، رۆژانە لە رێگەی لیژنەكانەوە بەداواداچوون پشكنین دەكرێت بۆ هەموو ئەو خۆراك و مەوادانەی لە بازارەكاندا دەفرۆشرێت.

تەئەكیدیشی كردەوە، لیژنەی هاوبەشی قایمقاميەتی كار لەسەر بنبڕكردنی دیاردەی خۆراكی بەسەر چوو و نرخی زیادە دەكات بۆ ناو سنوری  قەزای كەلار خاوەنەكانیان  رووبەرووی یاسا دەكاتەوە.

 دواتر سەرپەرشتیاری ئیدارەی گەرمیان قایمقامی قەزای كەلار راسپارد ئەو كارمەندانەی كە لیژنە هاوبەشی قایمقاميەتدا هەن ، بە تەواوی جێگیر بكرین لە لیژنەكەدا بۆ ئەوەی بتوانن بە بەردەوامی كارەكانیان راپەرێنین.