سه‌رپه‌رشتیاری ئیداره‌ی گه‌رمیان له‌گه‌ڵ به‌رپرسانی مه‌رزی په‌روێزخان كۆبوویه‌وه
.JPG)
13 / 5 / 2015
ئه‌مڕۆ (13ی ئایار) به‌مه‌به‌ستی چاره‌سه‌كردنی كێشه‌كانی مه‌رزی نێوده‌وڵه‌تی په‌روێزخان، سه‌رپه‌رشتیاری ئیداره‌ی گه‌رمیان له دیوانی ئیداره له‌گه‌ڵ به‌ڕێوه‌به‌ری كۆمه‌ڵگای ده‌روازی نێوده‌وڵه‌تی په‌روێخان و به‌ڕێوه‌به‌ری گومركی گه‌رمیان و سه‌رجه‌م به‌رپرسانی فه‌رمانگه‌كانی مه‌رزه‌كه كۆبوویه‌وه.
له كۆبوونه‌وه‌كه‌دا، كه هه‌ریه‌كه له به‌رَێوه‌به‌ره گشتییه‌كانی كشتوكاڵ و ته‌ندروستی گه‌رمیان ئاماده‌ی بوون، سه‌ڵاح كوێخا سه‌رپه‌رشتیاری ئیداره‌ی گه‌رمیان رایگه‌یاند: مه‌رزی نێوده‌وڵه‌تی په‌روێزخان مه‌رزێكی گرنگه و به‌شێك له داهاتی ناوخۆی هه‌رێمی كوردستان دابینده‌كات و له‌گه‌ڵ ئه‌وه‌شدا، ژماره‌یه‌كی زۆر له هاوڵاتیانی خۆستۆته كاره‌وه بۆیه پێویسته فه‌رمانگه‌كانی مه‌رزه‌كه به هه‌ماهه‌نگی له‌گه‌ڵ یه‌كتردا هه‌وڵ بده‌ن به باشترین شێوه كاره‌كان ئه‌نجام بده‌ن.
ووتیشی: ئێستا به‌شێكی زۆر له پێداویستییه‌كانی ناوچه‌كه به تایبه‌تی و هه‌رێمی كوردستان و ناوچه‌كانی خوارووی عێراق به گشتی، له رێگه‌ی مه‌رزی نێوده‌وڵه‌تی په‌روێزخانه‌وه دێنه هه‌رێمی كوردستان، بۆیه پێویسته فه‌رمانگه‌كانی مه‌رزه‌كه، له كوالێتی خۆراك و شمه‌كه هاورده‌كان بكۆڵێنه‌وه و به باشترین شێوه پشكنینیان بۆ بكه‌ن.
دواتر به‌رپرسی فه‌رمانگه‌كانی مه‌رزه‌كه له كۆبوونه‌وه‌كه‌دا چه‌ند كێشه و كه‌موكورتییه‌كیان خسته‌ڕوو به‌مه‌به‌ستی چاره‌سه‌ركردنیان، له‌وانه‌ش كێشه‌ی خزمه‌تگوزاری ناو مه‌رزه‌كه و زیادكردنی بنكه‌كانی گومرك، كه‌میی بینا و ئامێری پێویستی پشكنینی خۆراك و شمه‌ك، له‌به‌رامبه‌ردا، سه‌رپه‌رشتیاری ئیداره‌ی گه‌رمیان ئه‌وه‌ی خسته‌ڕوو، كه كاری جدی له‌سه‌ر جێبه‌جێكردنی داواكارییه‌كان و چاره‌سه‌ركردنی كێشه‌كان ده‌كات.
| 210 جار خوێندراوه‌ته‌وه |
|
|
|