ئەمڕۆ (۱٦ی کانوونی دووم) بەمەبەستی لە نزیکەوە ئاگاداربوون لە کاروباری فەرمانگەحکومەییەکان و گویگرتن لە داواکارییەکانیان، سەرپەرشتیاری ئیدارەی گەرمیان سەردانی قەزای کفری کرد و لە دیوانی قایمقامیەتی قەزاکە بە ئامادەبوونی قایمقام، لەگەڵ بەرپرسی فەرمانگە حکومییەکانی سنورەکە کۆبوویەوە.

لەسەرەتای کۆبونەوەکەدا، جەلال نوری قایمقامی قەزای کفری تیشکی خستەسەر کاری فەرمانگەکانی کفری و دەوامی فەرمانبەران و مامۆستایان و کاریگەری قەیرانی دارایی لەسەر کاری حکومەت لە سنورەکە و ئەو کار و پرۆژانەی کە پێویستن بۆ قەزاکە.

قایمقامی کفری ووتیشی: ئیدارەی گەرمیان و بە تایبەت سەرپەرشتیاری ئیدارەکە، هەمیشە پاڵپشت و پشتیوان بووە بۆ جێبەجێکردنی داواکارییەکانمان ئەوەش جێگەی سوپاس و پێزانینە.

هەر لەکۆبوونەوەکەدا، سەڵاح کوێخا سەرپەرشتیاری ئیدارەی گەرمیان، رایگەیاند: ئەمڕۆ بەمەبەستی لە نزیکەوە ئاگاداربوون لە کاری فەرمانگەکان و گوێگرتن لە داواکارییەکان سەردانی قەزاکەمان کردووە.

دواتر سەرپەرشتیاری ئیدارەی گەرمیان باسی لە قەیرانی دارایی و دواکەوتن و پاشەکەوتکردنی موچەی فەرمانبەرانی کرد و راشیگەیاند: لەماوەی رابردوودا قەیران کاریگەری زۆری هەبووە لەسەر کارەکانی حکومەت و بەهۆیەوە پرۆژە خزمەتگوزارییەکان پەکیان کەوتووە و پرۆژەی نوێ ئەنجام نەدراوە، دواکەوتن و پاشەکەوتکردنی موچەش فەرمانبەرانی نیگەران کردووە، ئێمەش لە ئیدارەی گەرمیان هەر لە یەکەم رۆژی دانانی سیستمی پاشەکەوتی موچە لەرێگەی بەیاننامەی فەرمیەوە ئەو سیستمەمان رەتکردۆتەوە و پشتیوانیمان لە داواکاری فەرمانبەرانمان کردووە.

سەرپەشتیاری ئیدارەی گەرمیان ووتیشی: لێرەوە سوپاسی خۆمان ئاراستەی بەڕێوەبەری فەرمانگەکان و فەرمانبەرانی قەزای کفری دەکەین کە سەرەڕای پاشەکەوتکردن و دواکەوتنی موچەکانیان دەوامیان کردووە و رۆژانە کار و مامەڵەی هاوڵاتیانیان راییکردووە.

دواتر هەر لە کۆبوونەوەکەدا، بەڕێوەبەر و بەرپرسی فەرمانگەکان، بەمەبەستی جێبەجێکردنیان، پێداویستی و داواکارییەکانیان خستەڕوو، داوایان کرد سەرپەرشتیاری ئیدارەی گەرمیان کار لەسەر جێبەجێکردنیان بکات، لای خۆیشیەوە، سەڵاح کوێخا سەرپەرشتیاری ئیدارەی گەرمیان، پێراگەیاندن، ئەوەی لە توانای ئیدارەی گەرمیان بێت جێبەجێی دەکەن و کار لەسەر داواکاتییەکانی تریش دەکات.