سەرپەرشتیاری ئیدارەی گەرمیان لەگەڵ قایمقام و بەڕێوەبەری فەرمانگەکانی کەلار کۆدەبێتەوە
25 / 1 / 2017
ئەمڕۆ (۲۵ی کانوونی دووم) بەمەبەستی لە نزیکەوە ئاگاداربوون لە کاروباری فەرمانگەحکومەییەکان و گویگرتن لە داواکارییەکانیان، سەرپەرشتیاری ئیدارەی گەرمیان لە دیوانی قایمقامیەتی قەزای کەلار بە ئامادەبوونی قایمقام، لەگەڵ بەرپرسی فەرمانگە حکومییەکانی کەلار کۆبوویەوە.
لەسەرەتای کۆبونەوەکەدا، شەهاب ئەحمەد قایمقامی قەزای کەلار تیشکی خستەسەر کاروباری رۆژانەی فەرمانگەکان و دەوامی فەرمانبەران و کاریگەری قەیرانی دارایی لەسەر کاری حکومەت لە سنورەکە و هاوکات ئەو کار و پرۆژانەشی خستەڕوو کە پێویستن بۆ قەزاکە.
قایمقامی کەلار ووتیشی: ئیدارەی گەرمیان و بە تایبەت سەرپەرشتیاری ئیدارەکە، هەمیشە پاڵپشت و پشتیوان بوون بۆ جێبەجێکردنی داواکارییەکانمان بۆیە هەر لێرەوە سوپاس و پێزانینی خۆمان ئاراستەی ئیدارەی گەرمیان دەکەین، ئومێدیش دەکەین قەیرانی دارایی کۆتایی بێت و بەهەموومانەوە بتوانین خزمەت بکەین.
هەر لەکۆبوونەوەکەدا، سەڵاح کوێخا سەرپەرشتیاری ئیدارەی گەرمیان، رایگەیاند: ئەمڕۆ بەمەبەستی لە نزیکەوە ئاگاداربوون لە کاری فەرمانگەکان و گوێگرتن لە داواکارییەکان سەردانی قایمقامیەتی کەلارمان کردووە.
دواتر سەرپەرشتیاری ئیدارەی گەرمیان باسی لە قەیرانی دارایی و دواکەوتن و پاشەکەوتکردنی موچەی فەرمانبەران کرد و راشیگەیاند: لەماوەی رابردوودا قەیران کاریگەری گەورەی هەبووە لەسەر کاروباری رۆژانەی حکومەت و بەهۆیەوە پرۆژەکان پەکیان کەوتووە و پرۆژەی نوێ ئەنجام نەدراوە.
راشیگەیاند: دواکەوتن و پاشەکەوتکردنی موچە فەرمانبەرانی نیگەران کردووە، ئێمەش لە ئیدارەی گەرمیان هەر لە یەکەم رۆژی دانانی سیستمی پاشەکەوتی موچە لەرێگەی بەیاننامەی فەرمیەوە ئەو سیستمەمان رەتکردۆتەوە و پشتیوانیمان لە داواکاری فەرمانبەرانمان کردووە.
سەرپەشتیاری ئیدارەی گەرمیان ووتیشی: لێرەوە سوپاسی خۆمان ئاراستەی قایمقام و بەڕێوەبەری فەرمانگەکان و فەرمانبەرانی سنوری قەزای کەلار دەکەین کە سەرەڕای پاشەکەوتکردن و دواکەوتنی موچەکانیان نەیانهێستووە دەوامی فەرمانگەکان پەکی بکەوێت و رۆژانە کار و مامەڵەی هاوڵاتیانیان راییکردووە.
دواتر هەر لە کۆبوونەوەکەدا، بەڕێوەبەر و بەرپرسی فەرمانگەکان، چەندین داواکارییەکانیان خستەڕوو، داواشیان کرد سەرپەرشتیاری ئیدارەی گەرمیان کار لەسەر جێبەجێکردنیان بکات، لای خۆیشیەوە، سەڵاح کوێخا سەرپەرشتیاری ئیدارەی گەرمیان، ئەوەی خستەڕوو، بەپێی توانا کار لەسەر جێبەجێکردنی داواکارییەکانیان دەکات.
643 جار خوێندراوهتهوه |
|