ئەمڕۆ (۳۱ تەمموز) سەپەرشتیاری مەلبەندی ۱٦ی دوزخورماتوی یەکێتی نیشتمانی کوردستان بە یاوەری ستافی مەڵبەندەکە سەردانی ئیدارەی گەرمیانی کرد و لەدیداری لەگەڵ سەرپەشتیاری ئیدارەی گەرمیان باس لە بارودۆخی سنوری دوزخورماتوو کرا.

لەو دیدارەدا، مەلا کەریم سەرپەرشتیاری مەڵبەندی دوزخورماروو رایگەیاند، لە ماوەی رابردوودا هێزەکانی پێشمەرگە لە سنوری دوز و حەمرین بە گیان فیدایی و وورەی پۆڵایین سنورەکانی کوردستانیان پاراستووە لە هێرشی تیرۆریستانی داعش بەمەش هەموومان قەرزاری پێشمەرگەین.

ووتیشی، لەگەڵ روخانی خەلافەتی داعش لە موسڵ چەکدارانی داعش جموجۆڵیان گواستۆتەوە بۆ  حەوزی حەمرین و دوز خورماتوو و کەرکوک بەڵام هێزەکانی پێشمەرگە هەمیشە لە ئامادەباشیدان بۆ هەر جوڵەیەکی داعش لە سنورەکە و چەندین جارە هێرەشەکانیان تێکدەشکێنرێت.

مەلا کەریم راشیگەیاند، جێگەی خۆیەتی لێرەوە سوپاسی ئیدارەی گەرمیان بکەین کە لە ماوەی سێ ساڵی رابردوودا و بەدرێژایی جەنگی داعش هاوکار و پشتیوانێکی زۆر باشی هێزەکانی پێشمەرگە بووە لە حەمرین و دوز ئەوەش جێگەی دەسخۆشیە.

هاوکات لە دیدارەکەدا، سەڵاح کوێخاسەرپەرشتیاری ئیدارەی گەرمیان رایگەیاند، جێگەی خۆیەتی هەموومان سوپاسی هێزەکانی پێشمەرگە بکەین لەبەرامبەر گیان فیداییان بۆ بەرگری لە خاکی کوردستان و پاراستنی ئەمنیەتی هاوڵاتیان لەو سنورە هەروەها هەوڵ و تێکۆشانی برادەرانی مەڵبەند و هاوڵاتیانی دوز بەگشتی دژ بە دوژمنان بەرز و پیرۆز دەنرخینین چونکە ئەو هەوڵانە خەباتە بۆ پاراستنی کوردستان بە هەموو دەنگ و رەنگێکەوە.

ووتیشی، ئیمە لە ئیدارەی گەرمیان لەماوەی رابردوودا بە پێی توانا هاوکار و پشتیوانی هێزەکانی پێشمەرگە بووین ئەوەش وەک ئەرکی سەرشانمان و لە پێناو سەرکەوتنی پێشمەرگە بەسەر تیرۆریستاندا، لە داهاتووشدا زیاتر هاوکار و پشتیوان دەبین.

دواتر، لە کۆبونەوەکەدا، باس لە باردۆخی کورد لە ناوچەی دوزخورماتوو و روداو و پێشهاتەکان کرا.