سەرپەرشتیاری ئیدارەی گەرمیان لەگەڵ شاندێکی ئەنجومەنی پارێزگای سلێمانی کۆبوەوە
2 / 8 / 2017
ئەمڕۆ (2ى ئاب) شانديێکى ئەنجومەنی پارێزگای سلێمانی کە پێکهاتبوو لة هەشت ئەندامی فراکسیۆنە جیاجیاکان بەمەبەستی هەماهەنگی نێوان ئيدارەی گەرمیان و ئەنجومەنی پارێزگا سەردانی ئیدارەی گەرمیانیان کرد و سەرپەرشتیاری ئیدارەی گەرمیان لە گەڵیان کۆبوەوە لە کۆبونەوەکەدا باس لە رێوشوێنەکانی پتەوکردنی پەیوەندییەکان و هەماهەنگی زیاتری نێوان هەردولا کرا.
بەرزان شێخ محەمەد سەرۆکی لیژنەی پەیوەندییەکانی ئەنجومەنی پارێزگای سلێمانی و سەرۆکی شاندەکە، لە کۆبونەوەکەدا رایگەیاند، ئەوان وەک ئەنجومەنی پارێزگای سلێمانی لەرێگەی لیژنەکانیانەوە بەپێی یاسا و رێنماییەکان کاریان چاودێری کاری فەرمانگەکانی حکومەتە ئەوەش لە پێناو باشتر باڕێوەچونی کارەکانی حکومەت.
ووتیشی، ئەمڕۆ بەمەبەستی پتەوکردنی پەیوەندییەکانی هەردولا و زیاتر هەماهەنگی بۆ کاروباری لیژنەکانیان لە سنوری ئیدارەی گەرمیان، سەردانیان کردووە. داواشیان کرد، ئیدارەی گەرمیان هاوکاری ئەنجومەنەکەیان بێت بۆ راییکردنی کارەکانیان لە سنوری گەرمیان. لای خۆیەوە سەڵاح کوێخا سەرپەرشتیاری ئیدارەی گەرمیان رایگەیاند، پەرلەمان و ئەنجومەنی پارێزگاکان بەپێی یاسا کاریان چاودێرێکردنی کارەکانی حکومەتە بۆیە ئێمە لە ئیدارەی گەرمیان لە ماوەی رابردوودا پەیوەندی باشمان لەگەڵ ئەنجومەنی پارێزگای سلێمانی هەبووە و ئەندامانی ئەنجومەن چەندین جار سەردانی ئیدارەی گەرمیان و فەرمانگەکانی حکومەتیان کردووە.
سەرپەرشتیاری ئیدارەی گەرمیان راشیگەیاند، لە پێناو باشتر راییکردنی کارەکان و لێکتێگەیشتنی زیاتر پێویستە بۆ لەمەودوا ئەندامانی ئەنجومەنی پارێزگا لەرێگەی نوسراوی فەرمی ئەنجومەنەکەوە سەردانی ئیدارەی گەرمیان و فەرمانگە حکومییەکانی سنورەکە بکەن و ئێمەش دەرگامان کراوەیە و هاوکار و هەماهەنگ دەبین.
دواتر،لە کۆبونەوەکەدا، باس لە کار و پرۆژەکانی سنوری ئیدارەی گەرمیان و کێشەو گرفتەکانی سنورەکە کرا.
1102 جار خوێندراوهتهوه |
|