ئەمڕۆ (۹ی کانوونی دووەم) بەمەبەستی هەماهەنگی و پتەوکردنی پەیوەندییەکان و تاوتوێکردنی باردۆخی ئەمنی و سیاسی ناوچەکە، شێرکۆ میروەیس لێپرسراوی مەڵبەندی خانەقین و محەمەد عەبدوڵا سەرپەرشتیاری مەڵبەندی گەرمیانی یەکێتی نیشتمانی کوردستان و وەفدی یاوەریان کەپێکهاتبوون لە ئەندام و کاڕگێری هەردوو مەلبەند سەردانی ئیدارەی گەرمیانیان کرد و لەگەڵ سەرپەرشتیاری ئیدارەکە کۆبوونەوە.

لەو دیدارەدا، کە بەڕێوەبەری پۆلیسی گەرمیان ئامادەبوو، سەڵاح کوێخا سەرپەرشتیاری ئیدارەی گەرمیان تیشکی خستەسەر گرنگی پەیوەندی و هەماهەنگی نێوان لایەنە سیاسییەکان و ئیدارە و رایگەیاند، ئیدارەی گەرمیان لەگەڵ لایەنە سیاسییەکان پەیوەندی باشی هەبووە و لە سەروبەندی بارودۆخە ناهەموارەکان و خۆپیشاندانەکان ئەو پەیوەندییانە رۆڵی باشیان بینیوە لە هێورکردنەوە بارودۆخەکان و چارەسەرکردنی گرفتەکان.

هەر لە کۆبونەوەکەدا، بە ووردی تاوتوێی دۆخی ئێستای قەزای خانەقین و ناحیەی جەلەولاو دەوروبەرییان کراو لەڕووی ئەمنییەوە تێڕوانین و دیدی یەکتریان بەهەند وەرگرت.

هاوکات لە کۆبونەوەکە، باس لە هەڵبژاردنی داهاتووی عێراق و هەریم و پرسی یەکڕیزی لایەنە کوردییەکان لەو ناوچانە کراو بەتایبەت بۆ ئەو مەبەستە یەکڕیزی نەتەوایەتی بۆ ئێستای قۆناغەکە بەگرنگەوە باسکرا.

ھاوکات ململانێ نێوخۆییەکانی ھەرێمی کوردستان کەلەئێستادا بوون بە ڕۆژەڤی

میدیاو کاریگەری خراپیان لەسەر کۆمەڵگە جێھێشتووە تەوەرێکی تری دیدارەکە بوو.

ھەردوولا جەختیان کردەوە کاربکەن ھەرچی زووە لەناوچەکەدا دەروونی نائارامی خەڵک ھێور بکرێتەوەو فەزایەکی ئارام و پڕ لە ئاسایش بۆ خەڵک فەراھەم بکرێت.