ئەمڕۆ (۱٠ی شوبات) بە یاوەری شاندێکی حکومی و قایمقامی قەزای خانەقین، سەرپەرشتیاری ئیدارەی گەرمیان بە نوێنەرایەتی سەرۆک و جێگری سەرۆکی حکومەتی هەرێم سەردانی پرسەی شەهیدەکانی چەند رۆژی رابردووی خانەقینی کرد.
لەو سەردانەدا، سەڵاح کوێخا سەرپەرشتیاری ئیدارەی گەرمیان وێڕای بەشداریکردن لە پرسەی شەهیدەکان، پەیامی ماتەمینی و سەرەخۆشی سەرۆکی حکومەتی هەرێم و جێگرەکەی بە خانەوادەی شەهیدەکان گەیاند و ئەوەی خستەڕوو "بەڕێزان نێچیرڤان بارزانی سەرۆکی حکومەت و قوباد تاڵەبانی جێگری سەرۆکی حکومەت، ئەوپەڕی نیگەرانن لە روداوەکە و هاوخەمتانن".
سەرپەرشتیاری ئیدارەی گەرمیان وێرای گەیاندنی پەیامی هاوخەمی دوپاتکردەوە، حکومەتی هەرێم هاوکاری تەواوی ئیدارەی خانەقین دەبێت بۆ دۆزینەوەی ئەنجامدەرانی کارە تیرۆریستیەکە و رادەستکردنیان بە دادگا.
هاوکات، سەڵاح کوێخا لە لێدوانێکی رۆژنامەوانیدا، رایگەیاند، ئەو هاوڵاتیانە کە شەهید بوون زۆربەیان لە کوردانی زەرگۆشی بوون ئەوە یەکەم جاریش نیە لەم سنورە کوردانی زەڕگوشی قوربانی دەدەن و کۆمەڵکووژ دەکرێن، دیارە تەنها لەبەر کوردبوون و ناسنامەی نەتەوەیی وایان لێدەکرێت.
داواشیکرد، هەرچی زووە دەزگا ئەمنییەکانی سەربە حکومەتی عێراق لە ناوچەکە هەموو هەوڵەکان بەگەڕبخەن بۆ دۆزینەوەی بکوژی حەوت گەنجەکەی خانەقین و ریگری بکەن لە دوبارە بوونەوەی روداو لەم شێوەیە.
لای خۆشیانەوە، خانەوادی شەهیدەکان سوپاسی سەرۆکی حکومەت و جیگری سەرۆکی حکومەتیان کرد بۆ هاوخەمییان و داوایانکرد، بکوژی کوڕەکانیان دەستگیربکرێت و سزای یاسایی خۆیان وەربگرن.
لەچەند شەوی رابردوودا، لە گەڕەکی بەختیاری خانەقین، چەند چەکدارێکی نەناسراو لە ناو ئۆتۆمبیلێکدا، دەستڕێژی گولەیان ئاراستەی ناو دوکانێک کرد و بە هۆیەوە حەوت هاوڵاتی شەهید بوون و دوو هاوڵاتی دیکەش بریندار بوون.