له‌ ئاگادارییه‌كدا كه‌ وێنه‌یه‌كی دراوه‌ته‌ سایتی (ئیداره‌ی گه‌رمیان) هاتووه‌ لیژنه‌ی باڵای تاپۆكردنی خانووه‌ بێ تاپۆكان له‌ ئیداره‌ی گه‌رمیان، ده‌ستی به‌كاره‌كانی كردووه‌ و له‌ هه‌نگاوی یه‌كه‌مدا داوا له‌ هاوڵاتیانی سێ گه‌ڕه‌كی شاری كه‌لار ده‌كات به‌مه‌به‌ستی تاپۆكردنی خانووه‌ بێ تاپۆكانیان سه‌ردانی شاره‌وانی بكه‌ن.

 ده‌قی ئاگادارییه‌كه‌:

ئاگادارییه‌ك له‌ لیژنه‌ی باڵای تاپۆكردنی خانووه‌ بێ تاپۆكان له‌ ئیداره‌ی گه‌رمیان

له‌ پاش ده‌رچوونی فه‌رمانی جێگری سه‌رۆكی حكومه‌تی هه‌رێم به‌ڕێز (قوباد تاڵه‌بانی) تایبه‌ت به‌تاپۆكردنی خانووه‌ بێ تاپۆكان و یه‌كلاییكردنه‌وه‌ی مافی هاوڵاتیان له‌سه‌ر زه‌وی ناو نه‌خشه‌ی بنه‌ڕه‌تی شاره‌وانییه‌كان، ئیداره‌ی گه‌رمیان لیژنه‌یه‌كی باڵای له‌سه‌رجه‌م فه‌رمانگه‌ په‌یوه‌ندیداره‌كان بۆ ئه‌و مه‌به‌سته‌ پێكهێنا.

وه‌ك هه‌نگاوی یه‌كه‌می كاره‌كان، لیژنه‌كه‌مان داوا له‌و هاوڵاتیانه‌ی گه‌ڕه‌كه‌كانی (فه‌رمانبه‌ران، بنگرد، شێروانه‌) له‌ شاری كه‌لار ده‌كات، كه‌ تا ئێستا خانووه‌كانیان تاپۆ نه‌كردووه‌، له‌ رۆژی یه‌كشه‌ممه‌ی داهاتوو (15/4/2018) به‌مه‌به‌ستی ده‌ستپێكردنی مامه‌ڵه‌ی تاپۆی خانووه‌كانیان سه‌ردانی سه‌رۆكایه‌تی شاره‌وانی كه‌لار بكه‌ن.

لیژنه‌ی باڵای تاپۆكردنی خانووه‌ بێ تاپۆكان له‌ ئیداره‌ی گه‌رمیان

11/4/2018