ئه‌مڕۆ (24ى تةمووزى 2018) به‌مه‌به‌ستی جێبه‌جێكردنی بڕیاری وه‌زاره‌تی ناوخۆی حكومه‌تی هه‌رێم بۆ رێگری له‌ ئۆتۆمبیلی جام ره‌ش و هەڵگرتنى چەکى بێ مۆڵەت و بەکارهێنانى ماتۆڕسکیل بەشێوازى ناشارستانى کۆبوونەوەیەک لەدیوانى ئیدارەى گەرمیان بەڕێوەچوو

به‌سه‌رپه‌رشتی سەڵاح کوێخا سه‌رپه‌رشتیاری ئیداره‌ی گه‌رمیان و مەحمود سەنگاوى بەرپرسى میحوەرى گەرمەسێری ھێزەکانی پێشمەرگە بە ئامادەبوونی قایمقامى قەزاکانى کەلار و کفرى و به‌ ئاماده‌بوونی به‌رپرسی ده‌زگا ئه‌منییه‌كان , کۆبوونەوەیەک لەدیوانى ئیدارەى گەرمیان بەڕێوەچوو , 

و بڕیاردرا ئەو هێزە هاوبەشەى پێکهێنراوە بۆ ڕێگریکردن لەو دیاردانە تۆکمەتر بکرێن و ئەوحاڵەتانەى دەبنە مایەى پشێوى و نائارامى ڕێگرییان لێبکرێت.

سه‌باره‌ت به‌ ناوه‌ڕۆكی كۆبونه‌وه‌كه‌، سەڵاح کوێخا سه‌رپه‌رشتیاری ئیداره‌ی گه‌رمیان

تیشکى خستە سەر هەندێک لەو حاڵەتانەو باسى لە لێکەوتەکانى بەردەوامبوونى سەرپێچى یەکان کرد و زەرورەتى ڕێگریکردنیانى ڕوونکردەوە.

هەروەک بەشداریکردنى بەرپرسى میحوەرى گەرمەسێرى پێشمەرگەى لەو هەلمەتەدا بەگرنگ وەسفکرد و کارەکانى ڕابردووى هێزە ئەمنییەکانیشى بەرز هەڵسەنگاند , لاى خۆشیەوە مەحمود سەنگاوى ئەم بڕیارەى حکومەتى هەرێمى بەکارێکى زۆرباش زانى و پاڵپشتى و هەماهەنگى هێزەکانى پێشمەرگەى بۆ جێبەجێکردنى ئەو بڕیارە دوپاتکردەوە , هەروەها ئارامى و ئاسایشى تەواوى ناوچەکانى گەرمیانى بە ئەرکى هەمیشەیى خۆیان و دەزگا پەیوەندیدارەکانى تر زانى .

پاشان بەتێرو تەسەلى بەشداربووانى کۆبوونەوەکە چۆنێتى ڕێگریکردن لەو دیاردانەو مامەڵەى هێزە ئەمنییەکان و تۆکمەکردنى ئەو هێزانەیان باس لێوەکرد , هەر لەو کۆبوونەوەیەدا بڕیاردرا ئەفسەرەکانى هێزەکانى ناوخۆو ئاسایش پابەند بن بەجێبەجێکردنى ئەم بڕیارەو بەهیچ جۆرێک پێچەوانەى ئەم بڕیارە ڕەفتار نەکەن.

هێزه‌ هاوبه‌شه‌كه‌ له‌ سه‌رجه‌م قه‌زا و ناحیه‌كانی سنوره‌كه‌ به‌ مه‌یدانی ده‌گه‌ڕێت و هه‌موو سه‌رپێچیكارێك به‌بێ جیاكاری و له‌به‌رچاوگرتنی پله‌ و پایه‌ ده‌ستگیرده‌كات و راده‌ستی یاسای ده‌كات.

بڕیارى قەدەغەکردنى ئۆتۆمبێلى جام رەش و بێ ژمارە و هەڵگرتنى چەکى بێ مۆڵەت لەلایەن وەزارەتى ناوخۆى حکومەتى هەریمى کوردستانەوە دەرچووەو لەتەواوى ناوچەکانى کوردستان و گەرمیانیش لەو چوارچێوەیەدا جێبەجێدەکریت