شاندێكی ئه‌نجومه‌نی پارێزگای سلێمانی سه‌ردانی ئیداره‌ی گه‌رمیان ده‌كات
8 / 8 / 2018
ئه‌مڕۆ (8ی ئابی 2018) لیژنه‌یه‌ك له ئه‌نجومه‌نی پارێزگای سلێمانی سه‌باره‌ت به پرۆژه‌ی نیشته‌جێبوونی مامۆستایان له كه‌لار، سه‌ردانی ئیداره‌ی گه‌رمیانی كرد و به‌ئاماده‌بوونی جێگره‌كه‌ی قایمقامی كه‌لار و به‌ڕێوه‌به‌ری وه‌به‌رهێنان سه‌رپه‌رشتیاری ئیداره‌ی گه‌رمیان له‌گه‌ڵیدا كۆبوه‌وه.
له‌و سه‌ردانه‌دا، خه‌دیجه عه‌بدولجه‌بار سه‌رۆكی لیژنه‌كه‌ی ئه‌نجومه‌نی پارێزگای سلێمانی رایگه‌یاند، دوای ئه‌وه‌ی ژماره‌یه‌ك له مامۆستایانی سنوری كه‌لار به ژماره‌یه‌ك ئیمزاوه سه‌ردانی ئه‌نجومه‌نی پارێزگای سلێمانییان كرد و داوایانكرد نرخی یه‌كه‌كانی نیشته‌جێبون دابه‌زێنرێت و ئێمه‌ش له‌لایه‌ن ئه‌نجومه‌نه‌وه وه‌ك لیژنه‌یه‌ك راسپێدراین پێداچوونه‌وه به نرخ و كوالێتی پرۆژه‌كه بكه‌ین.
ووتیشی، له به‌دواداچونی ئێمه نرخی پرۆژه خزمه‌تگوزارییه‌كان زیاده و داوا ده‌كه‌ین كه‌مبكرێته‌وه بۆ ئه‌وه‌ی یه‌كه‌كان به كه‌متر له‌سه‌ر مامۆستا بكه‌وێت و هه‌روه‌ها باخچه‌ی ساوایان و قوتابخانه‌كانی ناو پرۆژه‌كه به مواسفاتی نوێ بكرێت و نرخه‌كه‌ی كه‌متر بكرێته‌وه.
لای خۆیه‌وه سه‌ڵاح كوێخا سه‌رپه‌رشتیاری ئیداره‌ی گه‌رمیان رایگه‌یاند، ئه‌م پرۆژه‌یه له پێش ساڵی 2011 وه بۆ مامۆستایان ده‌رچووه و زه‌وی بۆ دابینكراوه و هه‌ندێك له رێكاره‌كانی ته‌واو بوو، له دوای ئه‌وه‌وه ئێمه هه‌وڵه‌كانمان به‌گه‌ڕخست بۆ مۆڵه‌تی پرۆژه‌كه و جێبه‌جێكردنی ئه‌وه بوو به ئیستسنایه‌ك كه به هه‌وڵی به‌ڕێز قوباد تاڵه‌بانی جێگری سه‌رۆكی حكومه‌ت كرا مۆڵه‌تی پرۆژه‌كه وه‌رگیرا و رێكاره‌كانی ته‌واو بوو.
ووتیشی، یه‌كێتی مامۆستایان بۆ پرۆژه‌كه خۆی گرێبه‌ستی له‌گه‌ڵ كۆمپانیاكه كرد، به‌ڵام ئێمه له ئیداره‌ی گه‌رمیان سه‌ره‌ڕای ئه‌وه به‌شێك نین له پرۆژه‌كه خۆیان گرێبه‌ستیان كردووه به‌ڵام هه‌موو هه‌وڵ و تواناكانمان به‌گه‌ڕخست كوالێتی پرۆژه‌كه باش بێت و له رووی نرخیشه‌وه له‌گه‌ڵ باری دارایی مامۆمستا بگونجێت به‌و هه‌وڵانه تاڕاده‌یه‌كی باش نرخی یه‌كه‌كان له به‌رژه‌وه‌ندی مامۆستایان كه‌م كرایه‌وه، دوای ئه‌وه‌ش له‌گه‌ڵ نوێنه‌ری مامۆستاكان سه‌ردانی جێگری سه‌رۆكی حكومه‌تمان كردووه بۆ ئه‌وه‌ی زیاتر نرخی یه‌كه‌كان كه‌مبكرێته‌وه.
سه‌باره‌ت، به داواكاری لیژنه‌كه‌ی ئه‌نجومه‌نی پارێزگای سلێمانی سه‌رپه‌رشتیاری ئیداره‌ی گه‌رمیان، ئه‌وه‌ی خسته‌ڕوو، ئیداره‌ی گه‌رمیان وه‌ك هه‌میشه ئاماده‌یه هاوكاری ئه‌نجومه‌نی پارێزگا بێت بۆ راپه‌راندنی كاروباری لیژنه‌كانیان و به‌ڕێوه‌به‌ری فه‌رمانگه په‌یوه‌ندیداره‌كانیشی راسپارد هاوكاری لیژنه‌كه بن بۆ پێداچونه‌وه به نرخ و كوالێتی و ده‌رخسته‌ی پرۆژه‌كه.
| 881 جار خوێندراوه‌ته‌وه |
|