ئەمڕۆ (9ی تشرینی دووەم) بەرپرسی مەڵبەندی گەرمیانی حزبی سۆسیالست بەیاوەری شاندێك سەردانی ئیدارەی گەرمیانی كرد و لەلایەن سەرپەرشتیاری ئیدارەی گەرمیانەوە پێشوازی لێكرا.

لەو سەردانەدا، محەمەد حەمە حەسەن بەرپرسی مەڵبەندی گەرمیانی حزبی سۆسیالستی كوردستان ووتی، ئێمە وەك مەڵبەندی سۆسیالست ئەمڕۆ هاتوین لە نزیكەوە چاومان بە ئێوە بكەوێت و جەخت بكەینەوە لەو پەیوەندیە بەهێزەی لە رابردوودا لەگەڵ ئیدارەی گەرمیان هەمانبووە.

ووتیشی، بەو هەماهەنگی و پەیوەندییەی لە نێوان ئیدارەی گەرمیاندا و لایەنەكان هەیە دەتوانین نمونەیەكی جوانی كاری پێكەوەیی پێشكەش بكەین و خزمەت بكەین.

بەرپرسی مەڵبەندی گەرمیانی حزبی سۆسیالستی كوردستان، راشیگەیاند، ئەوان پشتیوانی ئیدارەی گەرمیان دەبن و هیوای سەركەوتنیشی بۆ جەلال نوری سەرپەرشتیاری ئیدارەی گەرمیان خواست.

لای خۆیەوە، جەلال نوری سەرپەرشتیاری ئیدارەی گەرمیان سوپاسی شاندەی سۆسیالستی كرد بۆ سەردانەكەیان و جەختی كردەوە، لە بەردەوامی و گرنگی پەیوەندییەكان لەگەڵ لایەنە سیاسییەكان.

ووتیشی، ئێمە لە ئیدارەی گەرمیان وەك هەمیشە بڕوامان بە كاری پێكەوەیی هەیە و پێمان وایە بوونی پەیوەندی و هەماهنگی نێوان ئیدارە و لایەنە سیاسیەكان گرنگە و خزمەت بە بەرژوەوەندی گشتی  دەكات.