ئەمڕۆ (11ی تشرینی دووەم) بەیاوەری بەڕێوەبەری گشتی كشتوكاڵی گەرمیان، سەرپەرشتیاری ئیدارەی گەرمیان پرۆژەی سایلۆی كەلاری بەسەركردەوە و لە نزیكەوە بەشە جیاوازەكانی پرۆژەكەی بینی و ئامادەیی ئیدارەی گەرمیانی پیشاندا بۆ هاوكاری و هەماهەنگی بۆ تەواوكردنی پرۆژەكە.

لەو سەردانەیدا بۆ پرۆژەی سایلۆی كەلار، جەلال نوری سەرپەرشتیاری ئیدارەی گەرمیان ڕایگەیاند، پرۆژەی سایلۆی كەلار یەكێكە لە پرۆژە ستراتیجی و گرنگەكانی گەرمیان، كە بە تەواوبوونی  پرۆژەكە خزمەتێكی گەورە بە سنوورەكە ئەكات و ڕۆڵی دەبێت لە گەشەپێدانی كەرتی كشتوكاڵ و بە بازاڕكردنی بەرهەمی دانەوێڵەی جوتیاران.

وتیشی, ئیدارەی گەرمیان لە سەرەتای دەستپێكردنی پرۆژەكەوە هەوڵیداوە ئەم پرۆژەیە لە كاركردن بەردەوام بێت و نەوەستێت، بەدڵنیاییەوە لە داهاتووشدا بۆ تەواوكردنی پرۆژەكە هاوكار و هەماهەنگ دەبێت.

لەبارەی پرۆژەكە، سەلام حەمید ئەندازیاری سەرپەرشتیاری پرۆژەی سایلۆی كەلار ووتی، پرۆژەكە لەسەر بودجەی وەبەرهێنان بەگوژمەی 20 ملیار و 500 ملیۆن دینار دینار چوەتە بواری جێبەجێكردنەوە، تائێستاش كاركردن لە پرۆژەكە بەردەوامە و لە90% ی كارەكانی تەواو بووە.

لەبارەی پێكهاتە و بەشەكانی پرۆژەكەوە ئەندازیار سەلام حەمید ئەوەی خستەڕوو، پرۆژەكە پێكهاتووە لە 16 شوێنی عەمباركردنی گەنم كە توانای هەڵگرتنی 40 هەزار تەن گەنمی هەیە, هەروەها پێنج كۆگای گەورە و سێ (قەپان) بۆ كێشكردنی گەنمی تێدا درووست كراوە، لەگەڵ رێگاسازی پرۆژەكە. وتیشی، كاركردنی پرۆژەكە و ئیدارەدانی بە سیستمێكی ئەلیكترۆنی پێشكەوتوو دەبێت.