ئەمرۆ پێنچ شەممە (11ی شوبات) وەزیری ڕۆشنبیری و لاوانی حكومەتی هەرێم  سەردانی ئیدارەی گەرمیان كرد و لەلایەن سەرپەرشتیاری ئیدارەی گەرمیانەوە پێشوازی لێكرا.

لە سەردانەكەیدا بۆ ئیدارەی گەرمیان حەمەی حەمە سەعید وەزیری ڕۆشنبیری حكومەتی هەرێًم چەپكە گوڵی پیرۆزبایی پێشكەش بە جەلال نوری سەرپەرشتیاری ئیدارەی گەرمیان كرد و هیوای سەركەوتنی لە كارەكاندا بۆ خواست، لای خۆیەوە، سەرپەرشتیاری ئیدارەی گەرمیان سوپاسی كرد. 

لە دیدارەكەدا، حەمەی حەمە سەعید وەزیری رۆشنبیری ڕایگەیاند، خۆشحاڵین ئەمڕۆ لە گەرمیانین و بەمەبەستی هەماهەنگی زیاتر و پتەوكردنی پەیوەندیەكانمان سەردانی ئیدارەی گەرمیانمان كردووە، سوپاسی ئیدارەكەش دەكەین هەمیشە هاوكاری بەڕێوەبەرایەتی و فەرمانگەكانی سەر بە وەزارەتەكەمان بووە لە گەرمیان.

ووتیشی، ئەمڕۆش لەم سەردانەمان بۆ ئیدارەی گەرمیان هەمان بەڵێن دووپاتدەكەینەوە  كە گرنگی بە گەرمیان و چالاكییە هونەرییەكان لەم سنورە  بدەین.

لای خۆشیەوە، جەلال نوری سەرپەرشتیاری ئیدارەی گەرمیان،  وێرای بەخێرهاتنی وەزیری ڕۆشنبیری و وەفدی یاوەری، باسی لە رەوشی رۆشنبیری و چالاكیە هونەریەكانی گەرمیانی كرد و رایگەیاند، ئیدارەی گەرمیان هەمیشە هاوكار و هەماهەنگ بووە لەگەڵ بەڕێوەبەرایەتی گشتی رۆشنبیری گەرمیان بۆ ئەنجامدانی كار و چالاكیەكانیان.

سەرپەرشتیاری ئیدارەی گەرمیان دوپاتیشیكردەوە، ئیدارەی گەرمیان بە ئەركی خۆی دەزانێت پشتیوانی چالاكیە هونەری و رۆشنبیری و ئەدەبیەكان لە سنورەكە بكات، ئەوەش لەپێناو خزمەتكردنی بواری هونەر، بۆ ئەو مەبەستەش هاوكاری هونەرمەندان و پرۆژە  هونەرییەكان لە گەرمیان دەكات.