ئەمڕۆ (20ی ئایار) ژمارەیەك لە شۆفێری بارهەڵگرانی مەرزی نێودەوڵەتی پەروێزخان سەردانی ئیدارەی گەرمیانیان كرد و لە دیداریان لەگەڵ سەرپەرشتیاری ئیدارەی گەرمیان سوپاسنامەیەكیان ئاراستەی ئیدارەی گەرمیان كرد.

لەو دیدارەدا نوێنەری بارهەڵگرانی فلاتی مەرزی پەروێزخان رایگەیاند، ئێمە سوپاسی ئیدارەی گەرمیان دەكەین كە هاوكار و پشتیوانمان بووە بۆ دابینكردنی مافەكانمان و رۆڵ و  هاوكاریی و هەماهەنگییەكانی لەگەڵ سەندیكای كرێكاران لەپێناو چارەسەكردنی گرفتەكانمان.

لای خۆیەوە، جەلال نوری سەرپەرشتیاری ئیدارەی گەرمیان رایگەیاند، ئیدارەی گەرمیان هەمیشە هاوكار و پشتیوانی كرێكاران و كاسبكاران دەبێت و خزمەتكردنی ئەو چینە گرنگەی كۆمەڵگە بە ئەركی خۆی دەزانێت.

دواتر نوێنەری شۆفێران كێشەی خۆیان خستەڕوو، كە رۆژانە لەكاتی كاركردندا روبەرویان دەبێتەوە، لەبەرامبەردا سەرپەرشتیاری ئیدارەی گەرمیان ئامادەیی پیشاندا لە رێگەی فەرمانگە پەیوەندیدارەكانەوە كێشەكەیان چارەسەر بكرێت.