ئەمڕۆ (١٥ی ئەیلول) یەکەی چاودێری حکومەتی خۆجێی گەرمیان، سێهەمین کۆنفرانسی خۆی لەشاری کەلار ئەنجامدا و تەوەرەکەی تایبەت بوو بەشەفافیەت و سەرپەرشتیاری ئیدارەی گەرمیان بەشداربوو لە پانێڵێکی کۆنفرانسەکە.

لە کۆنفرانسەکەدا، کە ژمارەیەک لە سەرۆکی یەکە ئیداریەکان و بەڕێوەبەری گشتی و بەڕێوەبەرەکان و بەشێک لە رۆژنامەنوسان و چالاکانی مەدەنی ئامادەی بوون، لە دوو پانێڵدا پرسی شەفافیەت تاوتوێکرا.

لە میانی بەڕێوەچوونی پانێڵێکی کۆنفرانسەکە، جەلال شێخ نوری سەرپەرشتیاری ئیدارەی گەرمیان، بە وردی باسی لە پرسی شەفافیەت لە گەرمیاندا کرد و ئەو رێکارانەی رونکردەوە کە تایبەت بوون بە داهاتی سنورەکە و شەفافیەت تێیاندا.

دواتر، تیشکی خستەسەر پرۆژەکانی سنوری ئیدارەی گەرمیان و ئەو کێشە و گرفتانەی دێنە بەردەم پرۆژەکان و هۆکارەکانی تەواو نەبوونیان لەگەڵ ئەوەشدا، باسی لە رۆڵ و پێگەی چالاکان و رێکخراوەکان و رۆژنامەنوسان کرد لە چاودێری کار و پرۆژەکانی حکومەت و جەختیشی کردەوە ئیدارەی گەرمیان هەماهەنگی و لێکتێگەیشتنی باشی لەگەڵیاندا هەیە.

سەبارەت، بە دەرەنجامی کۆنفرانسەکەش سەرپەرشتیاری ئیدارەی گەرمیان رایگەیاند، ئیدارەی گەرمیان بەهەند وەریدەگرێت و کاری لەسەر دەکات.

هەر لە میانی بەڕێوەچوونی کۆنفرانسەکەدا، گفتوگۆی کراوە لەنێوان ئامادەبوان و بەڕێوەبەری بەڕێوەبەرایەتیەکان کرا و چەندین سەرنج و تێبینی لەبارەی پرسی شەفافیەتەوە باسیان لێوەکرا.