سەرپەرشتیاری ئیدارەی گەرمیان پێشوازی لە نوێنەری دانیشتوانی ناوچەی داوێ دەکات
22 / 1 / 2023
دوای ئەوەی لە گوندەکانی ناوچەی داوێ لەسنوری ناحیەی زیانانە، لەلایەن تیرۆریستانی داعشەوە چەندین کردەوەی تیرۆریستی ئەنجامدرا و دوو هاوڵاتی ناوچەکە رفێنرا و هەڕەشەکانی تیرۆریستان چڕتر بونەوە، ئەمڕۆ نوێنەری دانیشتوانی ناوچەکە سەردانی ئیدارەی گەرمیانیان کرد. لە سەردانەکەدا و کۆبونەوەیان لەگەڵ سەرپەرشتیاری ئیدارەی گەرمیان، بەئامادەبوونی جێگری سەرپەرشتیار، یاداشتێکیان خستەڕوو و داوایانکرد حکومەتی هەرێم کار بکات بۆ زیاترکردنی هێزەئەمنیەکان و تۆکمەکردنی ئەمنیەتی ناوچەکە. لای خۆیەوە، جەلال شێخ نوری سەرپەرشتیاری ئیدارەی گەرمیان، رایگەیاند، ناوچەی داوێ ناوچەیەکی گرنگی هەرێمی کوردستانە و لە رابردوودا لە پرۆسەی ئەنفال و شۆڕشدا قوربانی گەورەیان داوە. ئێمە لە ئیدارەی گەرمیان پاڵپشتی تەواوی داواکارییەکانتان دەکەین. ووتیشی، کاری پێویست و جدی لەسەر یاداشەتەکەتان دەکەین و ئاڕاستەی سەروی خۆمانی دەکەین و لەگەڵ ئەوەشدا هەموو رێگەیەک دەگرینەبەر بۆ چارەسەرکرەنی کێشەی ئەمنی لەو ناوچەیە.
| 229 جار خوێندراوه‌ته‌وه |
|
|
|