ئەمڕۆ (٢٣ی ئایار) سەرپەرشتیاری ئیدارەی گەرمیان سەردانی پۆلیسی گەرمیانی کرد و لە دیداری لەگەڵ بەڕێوەبەری پۆلیس، باس لە کارەکانی پۆلیس و هاوکاری و هەماهەنگیەکان کرا.

لەو سەردانەدا، جەلال شێخ نوری سەرپەرشتیاری ئیدارەی گەرمیان، رایگەیاند، سوپاسی پۆلیسی گەرمیان دەکەین، رۆڵێکی گەورە و کاریگەریان هەیە لە پاراستنی ئەمنیەتی سنورەکە و سەروماڵی هاوڵاتیاندا.

ووتیشی، ئیدارەی گەرمیان وەک هەمیشە هاوکار و هەماهەنگ دەبێت بۆ پۆلیسی گەرمیان و دابینکردنی پێداویستیەکانی ئەوەش بەئامانجی راییکردنی کارەکانی بەشێوەیەکی سەرکەوتوانە و خزمەتکردنی ناوچەکە.

لای خۆیەوە، عەمید محەمەد حاجی فایەق بەڕێوەبەری پۆلیسی گەرمیان سوپاسی سەرپەرشتیاری ئیدارەی گەرمیانی کرد بۆ سەردانەکەی و هاوکاری هەماهەنگیەکانی. هاوکات، باسی لە ئەرک و کارەکانی پۆلیسی گەرمیان کرد و جەختیکردەوە لە گرنگی هەماهەنگی نێوان پۆلیسی و دامودەزگاکانی حکومەت لەسنورەکە.