ئەمڕۆ (١٠ی ئاب) سەرپەرشتیاری ئیدارەی گەرمیان بەئامادەبوونی جێگری سەرپەرشتیار، پێشوازیکرد لە وەزیری تەندروستی حکومەتی هەرێم و بریکاری وەزەرەتەکەی و شاندی یاوەری.

لە دیداری نێوانیان باس لە کێشە و گرفتەکانی کەرتی تەندروستی گەرمیان کرا و جەختکرایەوە لەبەگەرخستنی هەوڵەکان بۆ باشترکردنی خزمەتگوزارییە تەندروستیەکان.

لەدیدارەکەدا، جەلال شێخ نوری سەرپەرشتیاری ئیدارەی گەرمیان، ئامادەیی ئیدارەی گەرمیانی پیشاندا بۆ هاوکاریکردنی تەندروستی گەرمیان و چارەسەری کێشە وگرفتەکانی، ئەوەشی خستەڕوو، تەندروستی گەرمیان بەهۆی پێشکەشکردنی خزمەتگوزاری بەناوچە دابڕێنراوەکان لۆدی زۆری لەسەرە و پێویستی بە ئاوردانەوەی زیاترە لە هەموو روییەکەوە.

لای خۆیەوە، د.سامان بەرزنجی وەزیری تەندروستی، ئاماژەی بەوەدا لە ماوەی رابردوودا بەدواداچونیان بۆ کێشە و گرفتەکانی تەندروستی گەرمیان کردووە و کار لەسەر چارەسەرکردنی دەکەن، ئەوەشی دوپاتکردەوە، ئەمڕۆ سەردانی مانگراتوانی قەزی کفری دەکەن و داخوازییەکانیان لە بواری تەندروستی وەردەگرن بەئامانجی جێبەجێکردنیان.