ئەمڕۆ(۲۱ی شوبات) لیژنەی باڵای پەسەندکردنی پرۆژە پێشنیارکراوەکانی بواری وەبەرهێنان لە ئیدارەی گەرمیان کۆبویەوە و چەند پرۆژەیەکی پێشنیارکراوی پەسەند کرد.

لە کۆبونەوەکەدا، سەڵاح کوێخا سەرپەرشتیاری ئیدارەی گەرمیان و سەرۆکی لیژنەکە، تیشکی خستەسەر رۆڵ و گرنگی وەبەرهێنان لە گەشەکردن و بواژەنەوەی شارەکاندا، ئەوەشی راگەیاند: گەرمیان پێویستی بە پرۆژەی جۆراوجۆری وەبەرهێنانە و دەبێت هەموو لایەنە پەیوەندیدارەکان کارئاسانی بۆ وەبەرهێنەران بکەن لەچوارچێوەی یاساو رێنماییەکان تا وەبەرهێن زیاتر روو لە گەرمیان بکات و سەرمایە بەگەڕ بخات و پرۆژەی گرنگی وەبەرهێنان لە سنورەکە جێبەجێ بکرێن.

ووتیشی: لەماوەی رابردوودا ئیدارەی گەرمیان پاڵپشتی تەواو بووە بۆ گەشەکردنی کەرتی وەبەرهێنان و چەندین پرۆژەی گرنگ و جۆراوجۆری وەبەرهێنان جێبەجێ کراون یان لە قۆناغی جێبەجێکردندان.

دواتر لە کۆبوونەوەکەدا، ئەو پرۆژانەی لەلایەن وەبەرهێنەرانەرانەوە پێشنیار کرابوون لە کەلار جێبەجێ بکرێن لەلایەن ئەندامانی لیژنە بە ووردی تاوتوێکران و دواتر بە زۆرینەی دەنگ پەسەندکران بۆ جێبەجێکردن.