ئەمڕۆ(٦ی ئاب) بەمەبەستی جێبەجێکردنی داواکارییەکانیان نوێنەری رێکخراوەکانی بواری ئەنفال سەردانی ئیدارەی گەرمیانیان کرد و سەرپەرشتیاری ئیدارەکە بەڵێنی پێدان کار لەسەر ئەو داواکارییانە بکات کە لە سەردانەکەیدا بۆ گەرمیان رێکخراوەکان ئاراستەی جێگری سەرۆکی حکومەتیان کردووە.

لەو سەردانەدا، هاوڕێ پێشڕەو سەرۆکی رێکخراوی داکۆکیکار لە کەسوکاری یەنفالکراوان رایگەیاند، لەماوی رابردوودا جێگری سەرۆکی حکومەتی هەرێم سەردانی ناحیەی رزگاری کرد، ئێمەش وەک رێکخراوەکانی بواری ئەنفال چەند داواکارییەکی تایبەت بە پرسی ئەنفالمان ئاراستەی کرد.

ووتیشی، بە سوپاسەوە بەدواداچون بۆ هەندێ لەو داواکارییانە کراوە و جێبەجێدەکرێن بەڵام هەندێکی تری ماوە ئەمڕۆ هاتوین ئیدارەی گەرمیان کار لەسەر جێبەجێکردنی ئەو داواکاریانە بکات.

لای خۆیەوە سەڵاح کوێخا سەرپەرشتیاری ئیدارەی گەرمیان رایگەیاند، بڕیارە لەچەند رۆژی داهاتوودا سەردانی جێگری سەرۆکی حکومەت بکات و جەختی کردەوە یەکەم کاری ئەوە دەبێت داواکارییەکان دەخاتە بەردەستیان.