ئەمڕۆ (۲۳ی کانوونی دووەم) دەستەی سەرپەرشتیارانی مەراسیمی یادی کەلار سەردانی ئیدارەی گەرمیانی کرد و بەئامادەبوونی قایمقامی قەزای کەلار سەرپەرشتیاری ئیدارەی گەرمیان لەگەڵیان کۆبویەوە و بەڵێنی هاوکاری تەواوی پێدان.

لەو کۆبونەوەکەدا، دەستەکە ئەوەیان خستەڕوو، لەئێستادا دەستیان کردووە بە ئامادەکاری بۆ ئەنجادانی مەراسیمی تایبەی بە یادی کەلار کە لە ۲۸ی شوبات و لە رۆژی کەلاردا ئەنجامی دەدەن، راشیانگەیاند، بۆ راییکردنی یادەکە پێویستیان بە هاوکاری مادی و مەعنەوی ئیدارەی گەرمیانە.

لای خۆیەوە، سەڵاح کوێخا سەرپەرشتیاری ئیدارەی گەرمیان، دەستخۆشی لە دەستەکە کرد و ووتی "کەلار شارێکی زیندووی هەرێمی کوردستان بە گشتی و ئیدارەی گەرمیانە بەتایبەتی بۆیە بەرز راگرتنی یادی دامەزراندنی پێویستە".

هاوکات سەرپەرشتیاری ئیدارەی گەرمیان پشتیوانی و پاڵپشتی ئیدارەی گەرمیانی بۆبۆ ئەنجامدانی  مەراسیمی یادی کەلار دوپاتکردەوە و ئامادەییشی پیشاندا هەموو تێچووی مادی مەراسیمەکە لە ئەستۆ بگرێت.

لە رۆژی ۲۸ی شوباتی ۱۹۷٠ بە مەرسومی کۆماری، کەلار کراوە بە قەزا و پاش فراوانبوونی شارەکە و زیاتر گەشەکردنی، لە ساڵی ۲٠٠٦وە حکومەتی هەرێمی کوردستان کردویەتی بە ناوەندی ئیدارەی گەرمیان و هاوشێوەی مەرکەزی پارێزگاکانی تری هەرێم دامودەزگاکانی حکومییەکانی تێدا کراوەتەوە. 

ساڵانەش لە رۆژی ۲۸ی شوباتدا، بەسەرپەرشتی قایمقامیەتی قەزای کەلار و بە بەشداری رۆژنامەنوسان و چالاکانی کۆمەڵی مەدەنی و هاوڵاتیانی شارەکە، مەراسیم و چالاکی جۆراوجۆر ئەنجام دەدرێت.