ئەمڕۆ (24ی تشرینی دووەم) سەرپەرشتیاری ئیدارەی گەرمیان لە دیوانی ئیدارە پێشوازیكرد لە دەزگای گشتی كاروباری مین و شاندى یاوەرى، لە دیداری نێوانیان جەخت لە هاوكاری و هەماهەنگی نێوان هەردولا كرایەوە.

لەو دیدارەدا، جەلال نوری سەرپەرشتیاری ئیدارەی گەرمیان رایگەیاند، ئیدارەی گەرمیان سنورێكی فراوانی لەگەڵ كۆماری ئیسلامی ئێراندا هەیە و بەهۆی جەنگی هەشت ساڵەی ئێران - عێراقیشەوە روبەرێكی زۆر زەوی لە ناوچەكە تا ئێستاش بە مینڕێژكاروی ماونەتەوە، لەگەڵ ئەوەشدا، لە سەردەمی رژێمی بەعسدا بەهۆی هەبوونی چەندین سەربازگە لە دەوروبەری كەلار تا ئێستاش پاشماوەی مین و تەقەمەنی ماونەتەوە، ئەمە جگە لەوەی ناوچەكەمان هاوسنورە لەگەڵ ئەو ناوچانەی لە ژێر دەستی داعش بوون بەهۆی ئەوەش مەترسی پاشماوەی بۆمب و تەقەمەنی هێشتا هەیە.

ووتیشی، ئومێدەوارین لەسەر دەستی ئێوە ناوچەكەمان لە مین و تەقەمەنی پاكبكرێتەوە و ئەو مەترسیانەی لەسەر هاوڵاتیان بەگشتی و جوتیاران و ئاژەڵداران بە تایبەتی هەن نەمێنن. 

سەرپەرشتیاری ئیدارەی گەرمیان ئامادەیی ئیدارەكەیشی پیشاندا بۆ هاوكاری و هەماهەنگی لەگەڵ بەڕێوەبەرایەتی گشتی كاروباری مین لە گەرمیان.

دواتر جەبار مستەفا، سەرۆكی دەزگای گشتی كاروباری مین رایگەیاند، گەرمیان ناوچەیەكی فراوان و گرنگە و لە خەباتی رزگاری گەلەكەماندا زۆرترین قوربانی داوە و بۆیە ئێمە دەستپێكی سەردانە مەیدانیەكانمان لە گەرمیانەوە دەستپێكردووە.

ووتیشی، لەماوەی رابردوودا بەڕێوەبەرایەتیی گشتیمان لە سنورەكە كاری باشی كردووە بۆ نەهێشتنی مین، دیارە ئیدارەی گەرمیانیش هەمیشە هاوكار و هەماهەنگ بووە لەگەڵماندا بۆیە سوپاسی ئیدارەكە دەكەین، ئومێدیش دەكەین ئەو هاوكاری و هەماهەنگیەی هەیە زیاتر پەرەی پێبدەین.

دوبەدوای دیدارەكەش، لە كۆنگرەیەكی رۆژنامەوانیدا جەبار مستەفا سەرۆكی دەزگای گشتی كاروباری مین و جەلال نوری سەرپەرشتیاری ئیدارەی گەرمیان تیشكیان خستەسەر سەردانەكە و كاری هاوبەشی نێوان هەردولا.