ئەمڕۆ (2ی شوبات) ستافی بەڕێوەبردنی فیتسڤاڵی بازاڕ سەردانی ئیدارەی گەرمیانیان كرد و لەبەرامبەر هاوكاری و پشتیوانیەكانی ئیدارەی گەرمیان، خەڵاتی رێزلێنیان بەخشیە سەرپەرشتیاری ئیدارەی گەرمیان.

لەو سەردانەدا، ستافی بەڕێوەبردنی فیستیڤاڵی بەبازاڕكردن كە ماوەی هەفتەیەك لە شاری كەلار بەڕێوەچوو، سوپاسی ئیدارەی گەرمیان و دەزگا ئەمنیەكان و فەرمانگەكانی سنورەكەیان كرد، لەبەرامبەر هاوكاریی و كارئاسانیكردن و پاراستنی ئەمنیەتی فیستیڤاڵەكە.

ئەوەشیان دوپاتكردەوە، كارەكانی فیستیڤاڵەكەیان وەك یەكەمین فیستیڤاڵ لە گەرمیان، بەشێوەیەكی باش و سەركەوتوانە بەڕێوەچووە و لەو رۆژانەدا، دەیان كۆمپانیا لە دهۆكەوە تا گەرمیان بەشداریان كردووە و دەیان هاوڵاتی توانای خۆیان بۆ بەرهەمهێنانی بەرهەمی ناوخۆیی خستۆتەڕوو، سەرەڕای قەیرانی دارایی نزیكەی ملیارێك دینار شمەك فرۆشراوە و نزیكەی 60 ملیۆن دینار شمەك و كاڵا وەك دیاری بەخشراوە بە هاوڵاتیان، دوپاتیشیان كردەوە كار لەسەر ئەوە دەكەن ساڵانە بەردەوام بێت.

لای خۆیەوە، جەلال نوری سەرپەرشتیاری ئیدارەی گەرمیان رایگەیاند، ئێمە لە ئیدارەی گەرمیان وەك هەمیشە هاوكار و هەماهەنگ دەبین بۆ برەودان بەكەرتی بازرگانی و هەر پرۆژەیەك لەو روەوە خزمەت بە ناوچەكە بكات و رۆڵی هەبێت لە فراوانكردنی جوڵەی بازرگانی و رەخساندنی هەلی كار و بوژانەوەی گەرمیان.

ووتیشی، ئیدارەی گەرمیان لەساڵانی داهاتووشدا هاوكار دەبێت بۆ سازدان فیستیڤاڵەكە و پێشنیاریش دەكەین، ساڵی داهاتوو ئەگەر سازدرا فراوانتر بكرێت و تەنها لە شاری كەلار نەبێت و بەڵكو چەند رۆژێكیش ببرێتە كفری، ئەوەش بەو ئامانجەی فیستیڤاڵەكە خزمەت بە شاری كفریش بكات.