ئەمرۆ (7ی شوبات) سەرپەرشتیاری ئیدارەی گەرمیان سەبارەت بە دەستپێكردنەوەی پرۆسەی خوێندن و گرتنەبەری رێكارەكانی خۆپارێزی لە ڤایرۆسی كۆرۆنا، سەرپەرشتیاری ئیدارەی گەرمیان لەگەڵ سەرۆكی زانكۆی گەرمیان و بەڕێوەبەرە گشتیەكانی پەروەردە و تەندروستی گەرمیان و بەڕێوەبەری پەروەردەی كەلار و كفری و خانەقین كۆبوەوە.

لەكۆبوونەوەكەدا جەلال نوری سەرپەرشتیاری ئیدارەی گەرمیان  تیشكی خستەسەر بڕیار و رێكارەكانی لیژنەی باڵای روبەروبورنەوەی ڤایرۆسی كۆرۆنا لە هەرێم و گرتنەبەری رێكارە خۆپارێزیەكانی تایبەت بە دەستپێكردنەوەی پرۆسەی خوێندن.

سەرپەرشتیاری ئیدارەی گەرمیان جەختیشیكردەوە، پێویستە لە ناوەندەكانی خوێندن رێكارەكانی خۆپارێزی لە ڤایرۆسی كۆرۆنا بگیرێتەبەر و بەپێی رێنماییەكانی لیژنەی باڵای روبەروبونەوەی ڤایرۆسی كۆرۆنا و وەزارەتی تەندروستی و  پەروەردە كار لەسەر خۆپارێزی بكرێت. بۆ ئەو مەبەستەش بەڕێوەبەرە گشتیەكانی تەندروستی و پەروەردەی ڕاسپارد، كە هەماهەنگی تەواو بكەن بۆ باشتر بەڕێوەچوونی پرۆسەی خوێندن لە سنورەكە.

هاوكات سەرپەرشتیاری ئیدارەی گەرمیان راشیگەیاند، هەموو هاوكاری و پشتیوانییەكی ئیدارەكەمان دەخەینەڕوو بۆ ئەوەی پرۆسەی پەروەردە بەشێوەیەكی باش بەڕێوەبچێت.

دواتر د.سیروان محەمەد، باسی لە بارودۆخی تەندروستی گەرمیان و ئامارەكانی كۆرۆنا كرد و ئەوەی خستەڕوو، دۆخی تەندروستی لە گەرمیان بەشێوەیەكی گشتی باشە، بەڵام پێویستە زیاتر ڕێنمایی و خۆپارێزی بڵاوبكرێتەوە ئەوەش بۆ ڕێگری لە بڵاوبونەوەی زیاتری ڤایرۆسەكە.

دواتر، د.فەرهاد قادر سەرۆكی زانكۆی گەرمیان باسی لە پرۆسەی خوێندن لەزانكۆی گەرمیان كرد و ئەوەی خستەڕوو، لە زانكۆی گەرمیان هاوشێوەی ناوەندەكانی پەروەردە رێكارەكانی خۆپارێزی لە ڤایرۆسی كۆرۆنا دەگیرێتەبەر ئەوەش لەپێناو سەلامەتی هەموان.

دوابەدوای ئەوەش، بەڕێوەبەری گشتی پەروەردەی گەرمیان و بەڕێوەبەری پەروەردەی قەزاكان باسیان لە رێنماییەكانی وەزارەتی پەروەردە و دەستپێكردنەوەی پرۆسەی خوێندن لەژێر رۆشنایی بڕیارەكانی وەزارتی پەروەردە كرد و جەخیتان كردەوە، لە گرتنەری رێكارە تەندروستی و خۆپارێزییەكان لە ناوەندەكانی خوێندن.