ئەمڕۆ (23ی شوبات) سەرپەرشتیاری ئیدارەی گەرمیان پێشوازیكرد لە وەزیری هەرێم بۆ كاروباری پێكهاتەكان و شاندی یاوەری لە پێكهاتە ئاینی و نەتەوەییە جیاوازەكان، لە دیداریی نێوانیان باس لەپرسی پێكەوەژیان و بارودۆخی پێكهاتەكان لەسنورەكە كرا.

ئایدن مەعروف وەزیری هەرێم بۆ كاروباری پێكهاتەكان رایگەیاند، گەرمیان ناوچەیەكی گرنگی پێكەوەژیانە و چەندین نەتەوە و ئاین و ئایینزا بە بێ كێشە پێكەوە دەژین، ئەمڕۆ هاتوین بۆ گەرمیان تا لە نزیكەوە ئاگاداری ژیان پێكهاتەكان بین، بۆ ئەومەبەستەش كوبونەوە و دیدارمان لەگەڵ نوێنەری پێكهاتەكان لە كەلار و كفری دەبێت.

ووتیشی، یەكێك لە سیاسەتە جوانەكانی حكومەتی هەرێم پشتیوانیكردنی پێكهاتە جیاوازەكان و دابینكردنی دەرفەتەكانی پێكەوەژیانە، دیارە ئەمەش لەسەرتاسەری شارەكانی هەرێم رەنگیداوەتەوە، لە گەرمیانیش نمونەی جوانی پێكەوەژیان لە نێوان ئاین و پێكهاتە نەتەوایتیەكان پێشكەشكراوە و سوپاس و دەستخۆشیمان هەیە بۆ ئیدارەی گەرمیان بۆ پەیڕەوكردنی ئەو سیاستە جوانە.

لای خۆیەوە، جەلال نوری سەرپەرشتیاری ئیدارەی گەرمیان ووتی، گەرمیان ناوچەیەكی فراوان و ستراتیژییە، بەشێكی دەكەوێتە سنوری ناوچە دابڕێنراوەكان، لە گەرمیاندا، بەبێ كێشە كورد و عەرەب و توركمان و ئاینزاكانی شیعە و سنونە و پەیڕەوكەرانی ئاینی كاكەیی و مەسیحی پێكەوە دەژین، ئاشتی و تەبایی لە نێوانیان هەیە ئەمەش جێگەی دڵخۆشی ئێمەیە.

سەرپەرشتیاری ئیدارەی گەرمیان ووتیشی، ئێمە لە ئیدارەی گەرمیان و دامودەزگاكانی حكومەت، پێكەوژیان و رێزگرتن لە پێكهاتە جیاوازەكان لە بەرنامەی كاركردنمان دایە و بە خۆشحاڵیەوە گەرمیان بوەتە مەركەزی پێكەوە ژیان.

سەرپەرشتیاری ئیدارەی گەرمیان ئەوەشی خستەڕوو، پێكهاتەكان بەبێ كێشە و گرفت ژیانی خۆیان دەكەن بەڵام بەداخەوە لە سنوری خانەقین چەند جارێك برایانی كاكەیی كەوتونەتە بەر هێرشی دڕندانەی تیرۆرسیتانی داعش و شەهید و قوربانیان داوە، بەڵام دەبێت ئەو راستیە بزانین كە داعش وەك پیشەی خۆی دوژمنی هەموو مرۆڤایەتیە.

دواتر لە دیدارەكەدا، كە هەر یەكە، لە قایمقامی قەزای كەلار و بەڕێوەبەری گشتی ئەوقاف و بەڕێوەبەرەكانی هاتوچۆ و بەرگری شارستانی گەرمیان ئامادەی بوون، باس لە پێكەوەژیانی پێكهاتە جیاوازەكان و رۆڵی دانشیتوانی گەرمیان لە راگرتنی هاوسەنگی و رێزگرتن لە پیرۆزیەكانی یەكتر كرا.