هەڵمەتی كوتانی ڤاكسینی كۆرۆنا لە گەرمیان دەستپێكرد
1 / 4 / 2021
بەیانی ئەمڕۆ (1ی نیسان) هەڵمەتی كۆتانی دژ بە كۆرۆنا لە گەرمیان دەستیپێكرد و پاش ئەوەی دوو هاوڵاتی بەتەمەن ژەمە ڤاكسینیان وەرگرت، سەرپەرشتیاری ئیدارەی گەرمیان و قایمقامی قەزای كەلار و بەڕێوەبەری گشتی تەندروستی گەرمیان و بەڕێوەبەری گشتی ئەوقاف ژەمە ڤاكسنیان وەرگرت.
لەمیانی وەرگرتنی ڤاكسینەكە لە مەڵبەندی تەندروستی گوڵاڵە لە شاری كەلار، جەلال نوری سەرپەرشتیاری ئیدارەی گەرمیان رایگەیاند، بەخۆشحاڵییەوە ئەوە دووەمینجارە ژەمە ڤاكسین دەگاتە ئیدارەی گەرمیان و بەڕێوەبەرایەتی گشتی تەندروستی گەرەمیان بەپێی پلانی خۆی لە كەلار و كفری و ناحیەی رزگاری سەنتەری داناوە بۆ كوتانی ئەو كەسانەی خۆیان دەكوتن.
ووتیشی، جێگەی خۆشحاڵیە ڤاكسینی دژ بە كۆرۆنا پێمان گەیشتووە، لە رابردوودا كۆرۆنا وەك پەتایەكی جیهانی بڵاوبوەوە و گەرمیانیش وەك هەر شوێنێكی تری جیهان لێی بەدەر نەبوو و هاوڵاتیانمان توش بوون و مەرگی ئازیزانمان بینی، بۆیە داوا لە هاوڵاتیانی خۆشەویستی گەرمیان دەكەین بە دەم داواكاری وەزارتی تەندورستی بێن و لەپێناو سەلامەتی و بەدوربونیان لە پەتای كۆرۆنا خۆیان بكوتن.
هاوكات، د.سیروان محەمەد جەمال بەڕێوەبەری گشتی تەندروستی گەرمیان رایگەیاند، ئێستا لە تەندروستی گەرمیان سێ هەزار ژەمە ڤاكسین ئامادەیە و دەتوانین وەك ژەمی یەكەم سێ هەزار هاوڵاتی بكوتین، دواتریش ژەمی دووەم وەردەگرن.
راشیگەیاند، بانگەواز دەكەین بۆ هاوڵاتیان لەو شوێنانەی لە شاری كەلار و كفری و ناحیەی رزگاری دیاریمان كردووە، ڤاكسین وەربگرن بۆ ئەوەی دوانەكەوین لە كاروانی پێدانی ڤاكسینی دژ بە كۆرۆنا.
876 جار خوێندراوهتهوه |
|