سەرپەرشتیاری ئیدارەی گەرمیان لەگەڵ رێکخراوەکانی کۆمەڵی مەدەنی کۆبوەوە
22 / 6 / 2021
ئەمڕۆ (٢٠ی حوزەیران) سەرپەرشتیاری ئیدارەی گەرمیان سەبارەت بە داواکاری تەواوکردنی پرۆژەی دوسایدکردنی رێگای کەلار - سلێمانی، لەگەڵ ناوەندی کاری ھاوبەشی رێکخراوەکان و ژمارەیەک لە چالاکانی سنورەکە کۆبوەوە.
لە کۆبونەوەکە رێکخراوەکانی کۆمەڵی مەدەنی ئەوەیانخستەڕوو، بە ئامانجی پەلەکردن لە تەواوکردنی پرۆژەی دوو سایدی رێگای کەلار سلێمانی ھاتونەتە ئیدارەی گەرمیان و داواشیان کرد بۆ ئەو مەبەستە ئیدارەکە ھەوڵەکانی چڕبکاتەوە.
ھاوکات ئامادەییان پیشاندا لە چوارچێوەی کاری رێکخراوەیی ھاوکاری ئیدارەی گەرمیان و فەرمانگە پەیوەندیدارەکان بن بۆ تەواوکردنی ئەو پرۆژەیە.
لای خۆیەوە جەلال نوری سەرپەرشتیاری ئیدارەی گەرمیان، سوپاسی رێکخراوەکانی کۆمەڵگەی مەدەنی کرد بۆ بەگەڕخستنی ھەوڵەکانیان تایبەت بە پرۆژەیەک کە خزمەت بە ھاوڵاتیان دەکات.
ووتیشی، ئێمە لە ئیدارەی گەرمیان لە ھەموو کۆبونەوەکانی تایبەت بە پرۆژەکان و داواکاریمان بۆ سەرەوەی خۆمان، داوای تەواوکردنی پرۆژە گرنگەکانمان کردوە لە نێویشیاندا بە پلەی یەکەم جەختمان لە تەواوکردنی رێگای کەلار سلێمانی کردوەتەوە.
ئەوەشی خستەوو، ئیدارەی گەرمیان بەردەوام لەگەڵ وەزارەتی ئاوەدانکردنەوە لەسەر خەتە بۆ ئەوەی ئەو پرۆژە گرنگە جارێکی تر رانەوەستێت و تەواو بکرێت.
542 جار خوێندراوهتهوه |
|