ئەمڕۆ (31ی تشرینی یەكەم) سەرپەرشتیاری ئیدارەی گەرمیان پێشوازیكرد لە سەركونسوڵی ئێران لە سلێمانی و لە دیداری نێوانیان باس لە كێشە و گرفتەكانی مەرزی پەروێزخان كرا.

لەو سەردانەدا، سەركونسوڵی كۆماری ئیسلامی ئێران لە سلێمانی رایگەیاند، بەلای ئێمەوە مەرزی پەروێزخان مەرزێكی گرنگ و پڕبایەخە لەنێوان ئێران و عێراقدا و ئەو كێشە و گرفتانەی لەچەند رۆژی رابردوودا لە مەرزەكە هاتوەتە ئاراوە كاریگەری گەورەی لەسەر جوڵەی بازرگانی هەبووە و داواكارین ئیدارەی گەرمیان كار لەسەر چارەسەری ئەو گرفتانە بكات و جوڵەی بازرگانی هاوشێوەی پێشوتر ئاسایی بێتەوە.

سەركونسوڵی كۆماری ئیسلامی ئێران جەختیشیكردەوە لە گرنگی پتەوكردنی پەیوەندییەكانی نێوان هەردولا و لێكتێگەیشتن لەسەر كێشە و گرفتەكان و بەگەڕخستنی هەوڵی هاوبەش بۆ چارەسەری كێشەكان. ووتیشی، ئێمە ئامادەین بۆ چارەسەركردنی كێَشە و گرفتەكانی مەرزەكە و كاركردن لەسەر زیاتر گەشەپێدانی مەرزی پەروێزخان.

لای خۆیەوە، جەلال نوری سەرپەرشتیاری ئیدارەی گەرمیان ئەوەی خستەڕوو، مەرزی پەروێزخان مەرزێكی گرنگە بۆ هەرێمی كوردستان و بەشێكی زۆری جوڵەی بازرگانی نێوان كۆماری ئیسلامی ئێران و هەرێمی كوردستان لە رێگەی مەرزی نێودەوڵەتی پەروێزخانەوەیە.

ووتیشی، ماوەی چەند رۆژێكە بەهۆی چەند كێشە و گرفتێكەوە، شۆفێرەكانی مەرزی پەروزێخان مانیان لە كاركردن گرتووە و ئێمەش هەر لەسەرەتای سەرهەڵدانی كێشەكانەوە لەسەر هێڵ بووین و كارمان لەسەر داواكارییەكانیان كردووە، لەرێگەی دادگاشەوە پرسی داخستنی مەرزەكە چارەسەر دەكەین.

دواتر لە كۆبوونەوەكەدا، تیشك خرایەر سەر كێشە و گرفتەكانی مەرزی پەروێزخان  بە گشتی و چڕكردنەوەی هەوڵەكانی هەردولا بۆ چارەسەری گرفتەكان و گەشەپێدانی زیاتری مەرزەكە.