ئەمڕۆ (٢٧ی تەمموز) سەرپەرشتیاری ئیدارەی گەرمیان بە ئامانجی چارەسەرکردنی کێشەوگرفتەکانیان و پەرەپێدانی گەشەی بازرگانی، لەگەڵ ژمارەیەک لەبازرگانانی سنورەکە کۆبووەوە.

جەلال شێخ نوری سەرپەرشتیاری ئیدارەی گەرمیان رایگەیاند، ئێمە لەئیدارەی گەرمیان بە گرنگییەوە لەکەرتی بازرگانی دەڕوانین و کاردەکەین بۆ چارسەرکردنی ئەو کێشەو گرفتانەی بۆ بازرگانانمان دێتە پێش لە مەرزی پەروێزخان و کەرتی بازرگانی بەگشتی.

ووتیشی، بەهۆی بوونی مەرزی پەروێزخان و هاوسنوری لەگەڵ پارێزگاکانی عێراق، گەرمیان ناوچەیەکی گرنگی بازرگانییە، ئێمە کاردەکەین بۆ ئەوەی کەرتی بازرگانی زیاتر ببوژێتەوە و بۆ ئەو مەبەستەش بەردەوام لە پەیوەندی و هەماهەنگیدا دەبین لەگەڵ بازرگانان.

سەرپەرشتیاری ئیدارەی گەرمیان جەختیشیکردەوە، بەڕێز جێگری سەرۆکی حکومەت بە گرنگیەوە لە مەرزی پەروێزخان و کەرتی بازرگانی سنورەکە دەڕوانێت و بۆ ئەو مەبەستە لە رابردوودا هاوکارێکی باشمان بووە و ئەوەش جێگەی دەستخۆشتیە.

دواتر بەڕێوەبەری بەڕێوەبەریەتیە پەیوەندیدارەکان باسیان لە کار و پلان و بەرنامەی خۆیان کرد بۆ پەرەپێدانی کەرتی بازرگانی و دوابەدوای ئەوەش بازرگانان باسیان لەکاری رۆژانەیان کرد و کێشە و گرفەتەکانیان خستەڕوو داوایانکرد گرفتەکانیان چارسەربکرێت.

لای خۆیەوە، سەرپەرشتیاری ئیدارەی گەرمیان جەختی لەوەکردەوە، ئەو کێشانەی لە کۆوبونەوەکە خرایەڕوو ئیدارەی گەرمیان کار لەسەر چارەسەرکردنیان دەکات.

لە کۆبوونەوەکەدا هەریەکە لەبەڕێوەبەرە گشتییەکانی تەندروستی و کشتوکاڵی گەرمیان و بەڕێوەبەی مەرزی پەروێزخان و گومرکی گەرمیان و نوێنەری بازرگانانی گەرمیان لەژوری بازرگانی و نوێنەری گەرمیانی هاوردە و هەناردەکارانی کوردستان ئامادەبوون.