ئەمڕۆ (١٩ی تشرینی یەکەم) سەرپەرشتیاری ئیدارەی گەرمیان بەئامادەبوونی جێگری سەرپەرشتیار و بەڕێوەبەری گشتی رۆشنبیری گەرمیان و ستافی بەڕێوەبەرایەتیەکە، پێشوازیکرد لە وەزیری رۆشنبیری و لاوانی حکومەتی هەرێم.

لە دیداری نێوانیان حەمەی حەمە سەعید، وەزیری رۆشنبیری، باسی لەگرنگی پەیوەندیەکان و هەماهەنگی و هاوکارییەکانی ئیدارەی گەرمیانی کرد بۆ دامەزراوەکانی سەربە وەزارەتی رۆشنبیری لە گەرمیان و بەڕێوەچونی کار و چالاکیەکانیان، بۆ ئەو مەبەستەش سوپاسی ئیدارەی گەرمیانی کرد.

لای خۆیەوە، جەلال شێخ نوری سەرپەرشتیاری ئیدارەی گەرمیان، دوپاتیکردەوە، ئیدارەی گەرمیان وەک هەمیشە هاوکار و پشتیوانی بەڕێوەبەرایەتیەکانی سەر بە وەزارەتی رۆشنبیری دەبێت، بۆ ئەنجامدانی چالاکیەکانیان و خزمەتکردنی بواری هونەر و رۆشنبیری و لاوان لە سنورەکە.