بەروار: 20/07/2025
ئەمڕۆ (٢٠ی تەمموزی ٢٠٢٥) سەرۆکی رێکخراوی خێرخوازی باجەڵان سەردانی ئیدارەی گەرمیانی کرد و لەدیداریان لەگەڵ سەرپەرشتیاری ئیدارەی گەرمیان باسیان لە کار و پرۆژە خێرخوازیەکانیان کرد. لەو دیدارەدا، دیار ئومێد سەرۆکی رێکخراوی خێرخوازی باجەڵان تیشکی خستەسەر کارە خێرخوازیەکانی رێکخراوەکەیان لە سنوری ئیدارەی گەرمیان و بەرنامەی کارەکانیان خستەڕوو، کە لەسەر ئەرکی خۆیان ئەنجامی دەدەن، هاوکات، ئامادەیی پیشاندا، بۆ ئەنجامدانی کاری خێرخوازی جۆراو جۆر بۆ خزمەتی گشتی لە سنورەکەدا. لای خۆیەوە، جەلال شێخ نوری سەرپەرشتیاری ئیدارەی گەرمیان، دەستخۆشی لێکردن بۆ کارە خێرخوازییەکانیان و ئەوەی خستەڕوو، لە پاڵ پرۆژەکانی حکومەت لە سنوری ئیدارەی گەرمیاندا، رێکخراو و خێرخوازان رۆڵێکی باشیان هەیە لە ئەنجامدانی پرۆژەی خێرخوازی و چارسەری کێشە و گرفتەکان. ووتیشی، ئێمە لە ئیدارەی گەرمیان هاوکار و پشتیوانتان دەبین بۆ ئەنجامدانی کارە خێرخوازییەکانتان ئەوەش بە ئامانجی خزمەتی گشتی لە سنورەکە.