بەروار: 24/07/2025
ئەمڕۆ (٢٤ی تەمموزی ٢٠٢٥) ناوەندی رێکخراوەکانی ژنان لە گەرمیان سەردانی ئیدارەی گەرمیانیان کرد و سەرپەرشتیاری ئیدارەی گەرمیان لەگەڵیاندا کۆبووەوە. لە کۆبوونەوەکەدا، کە هەیفا مەجید نوێنەری ئیدارەی گەرمیان بۆ کاروباری خانمان ئامادەی بوو، جەلال شێخ نوری سەرپەرشتیاری ئیدارەی گەرمیان، تیشکی خستەسەر رۆڵ و پێگەی رێکخراوەکانی بواری ژنان و ئامادەیی ئیدارەی گەرمیانی پیشاندا بۆ پشتیوانیکردن و هاوکاری بەردەوامیان. ئەوەشی خستەڕوو، ئیدارەی گەرمیان بەردەوام دەرگای کراوەیە بۆ رێکخراوەکانی بواری ژنان و رێکخراوەکانی تر، ئەوەش بە ئامانجی بەئاگابوون لە کێشە و گرفتەکانی ژنان و چین و توێژەکانی دیکەی کۆمەڵگە و دواتر چارەسەرکردنیان. لای خۆیانەوە، رێکخراوەکانی سەربە ناوەندی رێکخراوەکانی ژنان لە گەرمیان، سوپاسی سەرپەرشتیاری ئیدارەی گەرمیانیان کرد لەبەرامبەر پشتیوانی و هاوکاریی بەردەوامی بۆیان، ئەوەشیان دووپاتکردەوە، لەپێناو بەدیهێنانی مافەکانی ژنان لە سنورەکە یەکدەنگ و یەکهەڵوێست دەبن.