بەروار: 30/07/2025
ئەمڕۆ (٣٠ی تەمموزی ٢٠٢٥) ئەندامێکی ئەنجومەنی پارێزگای دیالە بە یاوەری ژمارەیەک لە هاوڵاتیانی عەرەبی گوندنشینی سنوری ناحیەی کۆکس سەردانی ئیدارەی گەرمیانیان کرد. لە دیداریان لەگەڵ سەرپەرشتیاری ئیدارەی گەرمیان، بە ئامادەبوونی بەڕێوەبەری گشتی کارەبای گەرمیان، ئەوس ئیبراهیم، ئەندامی ئەنجومەنی پارێزگای دیالە باسی لە کێشە و گرفتەکانی سنوری ناحیەی کۆکس و قەزای خانەقین کرد و سوپاسی ئیدارەی گەرمیانی کرد لەبەرامبەر بەدەمەوەهاتنی بۆ چارەسەرکردنی کێشەوگرفتەکانی ئەو سنورە. هاوکات، نوێنەری گوندەکانی علی خەڵەف و دەهلەکی و چەند گوندێکی تری سنوری ناحیەی کۆکس، باسیان لە رۆڵی ئیدارەی گەرمیان و دامودەزگاکانی حکومەتی هەرێم کرد لە چارەسەرکردنی کێشەکانیان و دابینکردنی خزمەتگوزارییەکان بۆیان بەتایبەت لە سێکتەرەکانی ئاو و کارەبا و رێگاوباندا. لای خۆیەوە، جەلال شێخ نوری سەرپەرشتیاری ئیدارەی گەرمیان، ئەوەی خستەڕوو، ئەو گوندانەی سنوری ناحیەی کۆکس وەک هەر شوێنێکی تری سنوری ئیدارەی گەرمیان حەقی ئەوەیان هەیە بەباشترین شێوە خزمەتیان بکەین، بۆیە بە گرنگیەوە لێیان دەڕوانین و وەک چۆن لە رابردوودا خزمەتگوزاری پێویستمان پێگەیاندوون هەوڵ دەدەین هەمیشە خزمەتگوزاری باشتریان پێشکەش بکەین.