سەرپەرشتیاری ئیدارەی گەرمیان پێشوازیکرد لە جێگری سەرۆکی هەرێمی کوردستان

بەروار: 31/07/2025

ئەمڕۆ (٣١ی تەمموزی ٢٠٢٥) سەرپەرشتیاری ئیدارەی گەرمیان بە ئامادەبوونی نوێنەری جێگری سەرۆکی ئەنجومەنی وەزیرن و جێگری سەرپەرشتیار و ژمارەیەک لە بەڕێوەبەری گشتی و بەڕێوەبەری دامودەزگا ئەمنیەکانی گەرمیان، پێشوازیکرد لە جێگری سەرۆکی هەرێمی کوردستان و شاندی یاوەری کە پێکهاتووبن لە ژمارەیەک فەرماندەی سەربازی و بەرپرسانی سیاسی.

لەو دیدارەدا، شێخ جەعفەر شێخ مستەفا، جێگری سەرۆکی هەرێمی کوردستان، خۆشحاڵی خۆی پیشاندا بۆ سەردانەکەی و رایگەیاند، گەرمیان ناوچەیەکە خاوەنی ئەنفال و قوربانیی گەورەیە و شایەنی ئەوەیە بە باشترین شێواز خزمەت بکرێت و دیارە دامودەزگاکانی ناوچەکە رۆڵی بەرچاویان بینیوە لە خزمەتکردن.

ووتیشی، جێگەی خۆشحاڵیە گەرمیان گەشە و بەرەو پێشچوونی باشی بەخۆوە بینیوە و خزمەتی باش کراوە و ئێمەش هاوکار و پشتیوان دەبین بۆ ئەوەی باشتر خزمەت بکرێت.

لەبەرامبەردا، جەلال شێخ نوری سەرپەرشتیاری ئیدارەی گەرمیان، باسی لە کار و پرۆژەکانی ئیدارەی گەرمیان کرد، ئەوەی خستەڕوو، ئیدارەی گەرمیان ناوچەیەکی گرنگ و ستراتیژییە بەهۆی بوونی مەرزی پەروێزخان و پێگەی جوگرافی و بونی سامانی سروشتی لە ناوچەکەدا، لە هەموو روویەکەوە پێشکەوتنی گەورەی بەخۆوە بینیوە، بە تایبەت لە بواری خزمەتگوزاری گشتی و وەبەرهێنان و بازرگانی و پیشەسازی.


ووتیشی، جێگەی خۆشحاڵیە لە گەرمیان حکومەت و لایەنەسیاسیەکان و چین و توێژەکان یەک هەڵوێست و یەک دەنگن بۆ خزمەتی سنورەکە. هاوکات، سوپاسی جێگری سەرۆکی هەرێمی کوردستانی کرد بۆ سەردانەکەی و دوپاتکردنەوەی پشتیوانی بۆ ئیدارەی گەرمیان.