بەروار: 01/08/2025
بەبۆنەی دەستگیرکردنی گەورە جەلاد و تاوانباری پرۆسەی ئەنفالی گەلی کورد (عەجاج احمد حەردان) ناسراو بە حەجاج، ئێمە لە ئیدارەی گەرمیان خۆشحاڵی دەردەبڕین و سوپاس و پێزانینی خۆمان ئاڕاستەی نوسینگەی سەرۆک کۆماری عێراق و خانمی یەکەمی عێراق و هەموو ئەو دامودەزگا پەیوەندیدارانە دەکەین کە رۆڵیان هەبووە لە دەستگیرکردنی ئەم تاوەنبارە خوێن رێژەی بەعسی فاشیزم. دیارە لای کەسوکاری سەربەرزی ئەنفالکراوان کە لە زیندانی نوگرەسەلمان زیندانی بوون، (حەجاج) ناوێکی ئاشنایە و هەرگیز لەبیر ناکرێت، ئەم دڕندەیە بە کردەوە تاوانکارییەکانی و شەهیدکردنی ژن و مناڵی کورد، ناو و ناوبانگی دەرکردبوو، هەر لەبەر زاڵمی و دڕندەیی کرابوو بە بەڕێوەبەری زیندانەکە. ئێمە لە ئیدارەی گەرمیان، داوا لە سەرجەم رێکخراوەکانی بواری جینۆسایدی ئەنفال و ئەو واریس و کەسوکاری ئەنفالکراوانە دەکەین، کە لەلایەن حەجاجەوە ئەشکەنجە دراون، یان کەسوکاریان شەهیدکراون، لە دادگاکاندا سکاڵا لەسەر ئەم تاوانبارە تۆمار بکەن، ئێمەش لە ئیدارەی گەرمیان بۆ ئەم مەبەستە و هەر هەنگاوێک خزمەت بە کەیسی ئەنفال و کەسوکاری ئەنفالکراوان بکات، هاوکار و هەماهەنگی تەواو دەبین. جەلال شێخ نوری سەرپەرشتیاری ئیدارەی گەرمیان