بەروار: 05/08/2025
دوای ئەوەی لە رۆژی (٢٠٢٥/١/٢٨) جەلال شێخ نوری، سەرپەرشتیاری ئیدارەی گەرمیان سەردانی قەزای خانەقینی کرد و لە کۆبونەوەی لەگەڵ قایمقام و بەڕێوەبەری فەرماگەکانی خانەقین داوای لێکرا ئەمبوڵانسێک بۆ خانەقین دابین بکرێت، لەسەر داوای ئیدارەی گەرمیان، ئەمڕۆ (٢٠٢٥/٨/٥)لە مەراسیمێکدا لەلایەن بەڕێوەبەرایەتی گشتی تەندروستی گەرمیانەوە ئەمبوڵانسێک بەخشرایە تەندروستی خانەقین. لە رێورەسمەکەدا، د.محەمەد ئازاد، بەڕێوەبەری گشتی تەندروستی گەرمیان رایگەیاند، خانەقین ئەگەرچی لەڕووی ئیداریشەوە سەر بە هەرێمی کوردستان نەبێت، بەڵام ناوچەیەکی کوردستانیی و دانەبڕاوە و بە ئەرکی خۆمانی دەزانین خزمەتی بکەین و هاوشێوەی ناوچەکانی دیکە خزمەتگوزاریی پێشکەش بکەین. وتیشی: لەمڕووەشەوە بەڕێوبەرایەتی گشتی تەندروستی گەرمیان بەڕێوبەرێتییەکی لە خانەقین هەیە و سەرپەرشتی ژمارەیەک مەڵبەند و بنکەی تەندروستی دەکات لە هەموو قەزای خانەقین و ناحییەکانی و بەردەوامن لە خزمەتکردن. هەروەک باسی لەوەشکرد ئەمڕۆش وەکو بەردەوامییدان بە خزمەتگوزارییەکان هەستاون بە پێشکەشکردنی ئەمبوڵانسێک بە تەواوی پێداویستییەکانەوە، بۆ ئەوەی لە خزمەتکردنی خەڵکی خۆشەویستی شاری خانەقین دا بەکاربهێنرێت.