بەروار: 05/08/2025
دوای ئەوەی لە رۆژی (٢٠٢٥/٤/١٥) ئیدارەی گەرمیان دوو داواکاری تایبەت بە کردنەوەی بەشی باجی ئۆتۆمبیل و هێنانە کایەی تێبینەرایەتی باجی دەرامەت و خانوبەرەی کفری ئاڕاستەی ئەنجومەنی وەزیران کرد، لە ئێستادا لەلایەن وەزارەتی داراییەوە رەزامەندی دراوە بە جێبەجێکردنی داواکاریەکانی ئیدارەی گەرمیان. پەیوەست بەم پرسە، ئەمڕۆ شاندێکی بەڕێوەبەرایەتی گشتی باجەکان لە وەزارەتی دارایی حکومەتی هەرێم، بەیاوەری باجی دەرامەتی گەرمیان سەردانی ئیدارەی گەرمیانیان کرد و لە دیداریان لەگەڵ سەرپەرشتیاری ئیدارەی گەرمیان جەختیان کردەوە، لە رۆژی یەکشەممەی داهاتووەوە مامەڵەی باجی ئۆتۆمبیلی بارهەڵگری تابلۆ سلێمانی لە هاتوچۆی گەرمیان ئەنجامدەدرێت لە کاتێکدا پێشتر دەبوو هاوڵاتیان بۆ ئەوە مەبەستە سەردانی شاری سلێمانیان بکردایە. هاوکات، شاندەکەی وەزارەتی دارایی ئەوەشیان خستەڕوو، بڕیار لەسەر هێنانە کایەی تێبینەرایەتی باجی دەرامەت و خانوبەرەی میری لە قەزای کفری دراوە و بەم زوانە لە کفری دەکرێتەوە و چیتر هاوڵاتیانی سنوری کفری لە شوێنی خۆیان مامەڵەکانیان رایی دەکەن. لەبەرامبەردا، جەلال شێخ نوری سەرپەرشتیاری ئیدارەی گەرمیان، سوپاسی ئاڕاستەی ئەنجومەنی وەزیران و وەزارەتی دارایی کرد، جەختیکردەوە لە گرنگی ئەو دوو دامودەزگایە بۆ خزمەتی گەرمیان و ئامادەیی ئیدارەکەشی پیشاندا، بۆ هاوکاریکردن و پشتیوانیکردنی تەواویان.