بەروار: 06/08/2025
ئەمڕۆ (٦ی ئابی ٢٠٢٥) سەرپەرشتیاری ئیدارەی گەرمیان سەردانی بەڕێوەبەرایەتی گشتی کاروباری شەهیدان و ئەنفالکراوانی گەرمیانی کرد و بەئامادەبوونی رێکخراوەکانی بواری ئەنفال لە نزیکەوە چاوی کەوت بە کەسوکاری سەربەرزی ئەنفالکراوان و لیژنەکە. لەو سەردانەدا، جەلال شێخ نوری سەرپەرشتیاری ئیدارەی گەرمیان، دەستخۆشی لە رێکخراوەکانی بواری ئەنفال و کەسوکاری ئەنفالکراوان و بەڕێوەبەرایەتی گشتی کاروباری شەهیدان کرد لەبەرامبەر دروستکردنی لیژنەیەکی تایبەت بە رێکخستەنەوەی کاروباری سکاڵا لەسەر عەجاجی تاوانباری ئەنفال. جەختیشی لە گرنگی رۆڵی خاتوو شاناز ئیبراهیم ئەحمەد خانمی یەکەمی عێراق کردەوە بۆ هەوڵ و پشتیوانیەکانی لە پرسی بەدادگا گەیاندنی عەجاج و ئەوەشی خستەڕوو، ئیدارەی گەرمیان هاوکار و پشتیوانی تەواو دەبێت بۆ ئەوەی زۆرترین قوربانی ئەنفال بتوانن سکاڵاکانیان تۆمار بکەن، ئەوەش بە ئامانجی بە سزا گەیاندنی عەجاج. دواتر، بەڕێوەبەری گشتی کاروباری شەهیدان و ئەنفالکراوان و لیژنەکە باسیان لە ووردەکاری کارەکانیان کرد و ئەوەیان خستەڕوو، لەم دوو رۆژەدا بەشێک لە کەسوکاری ئەنفالکراوان سەردانیان کردوون و لە رۆژانی داهاتووشدا بەردەوام دەبن لە کارەکانیان و لە پێشوازی کەسوکاری ئەنفالراواندا دەبن. هاوکات، رێکخراوەکانی بواری ئەنفال، ئامادەیی تەواویان پێشاندا بۆ هاوکاریکردنی لیژنەکە و بانگهێشتکردنی کەسوکاری ئەنفالکراوان بەمەبەستی تۆمارکردنی زۆرترین سکاڵا.