بەروار: 07/08/2025
ئەمڕۆ (٧ی ئابی ٢٠٢٥) سەرپەرشتیاری ئیدارەی گەرمیان بە یاوەری بەڕێوەبەری گشتیەکانی شارەوانیەکەکان و گەشتوگوزاری گەرمیان سەدانی قەزای کفری کرد لەلایەن قایمقامی کفری و بەڕێوەبەری فەرمانگەکان پێشوازی لێکرا. لەو سەردانەدا، جەلال شێخ نوری سەرپەرشتیاری ئیدارەی گەرمیان لە کۆنگرەیەکی رۆژنامەوانیدا رایگەیاند، بەخۆشحاڵیەوە ئەمڕۆ هاتوینەتە کفری بەردی بناغەی دوو شەقامی ناو شارمان دانا کە گوژمەی هەردوو پرۆژەکە نزیکەی ٢ ملیار و ٣٠٠ ملیۆن دینارە و ئەو پرۆژانەشی لە رابردوودا چونەتە بواری جێبەجێکردنەوە بەسەریان دەکەینەوە. ووتیشی، سوپاسی بەڕێز قوباد تاڵەبانی جێگری سەرۆکی ئەنجومەنی وەزیران دەکەین کە هاوکارێکی باشمان بووە بە ئەنجامدانی پرۆژەکانی سنوری قەزای کفری، هاوکات سوپاسی بەڕێز وەزیری پلاندانان دەکەین کە لە ماوەی کەمتر لە هەفتەیەک رێکارەکانی پرۆژەی شەقامی ناوشاری کفری بۆمان تەواو کرد. ووتیشی، سوپاسی بەڕێوەبەری گشتی بانکی ناوەندی لە سلێمانی و وەزارەتی دارایی دەکەین کە لە دابینکردنی نەختینەی پرۆژەکان هاوکارێکی باشی ئیدارەی گەرمیان بوون، لەگەڵ ئەوەشدا، سوپاسی سەرجەم دامودەزگاکانمان دەکەین کە رۆڵی باشیان بینیوە لە جێبەجێکردنی پرۆژەکان. دواتر سەردانی پرۆژەی کۆڕنیشی باوەشاسواری کفری کرد کە پرۆژەکە لە کۆتایی ساڵی رابردوو چوەتە بواری جێبەجێکردنەوە و بە گوژمەی ٣٨٩ ملیۆن و ٩٨٠ هەزار دینار لەسەر بودجەی بەڕێوەبەرایەتی گشتی گەشتوگوزاری گەرمیان جێبەجێدەکرێت. دواتر، سەردانی هێڵی کارەبای بەنداوی باوەشاسواری کرد کە کارەکانی تەواو بوون و دوابەدوای ئەوەش سەردانی گەڕەکی راپەڕینی قەزای کفری کرد و لە نزیکەوە پرۆژەی تەواوکراوی شەقام و قیرتاوی گەڕەکەکەی بەسەرکردەوە. لە کۆتا وێستگەی سەردانەکەیدا، جەلال شێخ نوری سەرپەرشتیاری ئیدارەی گەرمیان بە ئامادەبوونی بەڕێوەبەری رێگاوبانی گەرمیان، پرۆژەی رێگای قەرەبڵاغ- دوانزە ئیمامی لەسنوری قەزای کفری بەسەرکردەوە کە پرۆژەکە بە گوژمەی زیاتر لە ٦ ملیار و ٣٧٧ ملیۆن دینار جێبەجێدەکرێت کە ساڵی رابردوو بەردی بناغەی دانراو و لەئێستادا خراوەتە خزمەت هاوڵاتیان.