بەروار: 10/08/2025
دواى ئەوەى لە ماوەى رابردوودا بەنداوى ئاوەسپى لە سنورى قەزاى کفرى بەهۆکارى تەکنیکى بەردانەوەى ئاو تێیدا وەستا، بە فەرمانى سەرپەرشتیارى ئیدارەى گەرمیان و لەسەر بودجەى تایبەتى ئیدارەکە، وەک چارەسەرێکى خێرا لە رێگەى بەکارهێنانى بۆرى تایبەتەوە توانرا ئاوى بەنداوەکە بەر بدرێتەوە. لە دواى چارەسەرکردنى گرفتى بەنداوەکە لە لایەن فەرمانگەى بەنداوەکانى گەرمیانەوە، لە ئێستادا بەردانەوەى ئاو دەستیپێکردووە و سودى دەبێت بۆ زەوى کشتوکاڵى و باخ و حەوزى ماسى لەسنورەکە. لاى خۆیەوە، ئەندازیار جەبار مەحمود لێپرسراوی بەنداوەکانى گەرمیان، وێڕاى ئەوەى سوپاسى سەرپەرشتیارى ئیدارەى گەرمیان کرد بۆ دابینکردنى بودجەیەکى تایبەت بۆ چارەسەرکردنى کێشەى بەنداوى ئاوەسپى رایگەیاند، بەهۆى کێشەیەکى تەکنیکى کردنەوەى دەرگاکانى بەنداوەکە لە کارکەوتووە، وەک چارەسەرێکى خێرا و لە رێگەى بۆرییەوە، توانراوە ئاوى پێوست لە بەنداوەکە بەر بدرێتەوە، بە جۆرێک لەمڕۆوە لە کاتژمێرێکدا (٥٠٠) مەتر سێجار ئاو بەردەدرێتەوە و سودی دەبێت بۆ جوتیارانی سنورەکە.