بەروار: 13/08/2025
ئەمڕۆ (١٣ی ئابی ٢٠٢٥) سەرپەرشتیاری ئیدارەی گەرمیان لەگەڵ بەڕێوەبەری ئاوی دەوروبەری گەرمیان و بەڕێوەبەری فەرمانگەکانی ئاوی قەزا و ناحیەکان کۆبووەوە. لە کۆبوونەوەکەدا، نەوزاد حەمید، بەڕێوەبەری ئاوی دەوربەری گەرمیان باسی دابینکردنی خزمەتگوزاریی ئاو لە قەزا و ناحیە و گوندەکانی سنوری گەرمیان کرد و ئەوەی خستەڕوو، بە هەوڵی فەرمانگەکانمان و هاوکاری و پشتیوانیەکانی سەرپەرشتیاری ئیدارەی گەرمیان، لە ئێستادا، سەرەڕای کێشەکانی کەمبارانی و کەمی ئاو، بەشێوەیەکی باش ئاو دەدرێتە هاوڵاتیان، بەجۆرێک لە هەموو قەزا و ناحیە و گوندێکی سنورەکە ئاوی پێویست بۆ هاوڵاتیان دابینکراوە. دواتر، بەڕێوەبەری فەرمانگەکان باسیان لە کارەکانیان کرد و سوپاسی ئیدارەی گەرمیان و یەکە ئیدارییەکانیان کرد کە هاوکار و هەماهەنگی باشن لەگەڵیاندا، ئەوەش وایکردووە بەباشی کارەکانیان رابپەڕێنن. لای خۆیەوە، جەلال شێخ نوری سەرپەرشتیاری ئیدارەی گەرمیان، رایگەیاند، دەستخۆشی و پێزانینم هەیە بۆ کارەکانتان کە توانیوتانە بە خۆتان و کارمەندەکانتانەوە سەرەڕای دواکەوتنی موچە و کێشەی دارایی و وەرزی گەرما و کەمی ئاو، ئاوی پێویست بۆ سەرجەم هاوڵاتیانی گەرمیان دابین بکەن. ووتیشی، ئێمە لە ئیدارەی گەرمیان وەک هەمیشە هاوکار و پشتیوان دەبین و بەشێک دەبین لە چارەسەری کێشەکان و باشترکردنی خزمەتگوزاری ئاو لە سنورەکەدا.