بەروار: 18/08/2025
ئەمرۆ (١٨ی ئابی ٢٠٢٥) سەرپەرشتیاری ئیدارەی گەرمیان پێشوازی لە سەرۆکی ئەنجومەنی باڵای ڕێکخراوی خاوەن پێداویستییە تایبەتەکان و سەرۆک و ستافی ناوەندی گەرمیانی رێکخراوە دیموکراتییەکان کرد. لەدیداری نێوانیاندا عومەر جەبار، سەرۆکی ئەنجومەنی باڵای ڕێکخراوی خاوەن پێداویستییە تایبەتەکان پشتیوانی سەرپەرستیاری ئیدارەی گەرمیان و هەوڵ و کۆششەکانی بۆخزمەتی خاوەن پێداویستییەتایبەتەکان و بەدەمەوەهاتنیان لەکاتی پێویست لە ڕابردوودا بەرز نرخاند و هیوای خواست هەماهەنگی و پەیوەندییان بۆ خزمەتی خاوەن پێداویستیییە تایبەتەکان بتەوتر بکەن. بێستون تەها سەرۆکی ناوەندی گەرمیانی رێکخراوە دیموکراتییەکان، تیشکی خستە سەر کاری رێکخراوەییان لە سنووری گەرمیان بۆ خزمەتی گشتی و سوپاسی سەرپەرشتیاری ئیدارەی گەرمیانی کرد بۆ هەماهەنگی و پشتیوانی لە کاری ناوەندەکەیان بۆ خزمەتی گشتی و بەتایبەت خزمەتکردنی و نابیستان و نابینایان و خاوەن پێداویستییەتایبەتەکان. لای خۆشیەوە (جەلال شێخ نوری)سەرپەرشتیاری ئیدارەی گەرمیان ڕایگەیاند، خزمەتکردنی خاوەن پێداویستییە تایبەتەکان لەرێگەی ڕێکخراوەکان و ئێوەوە ئەرکە و ئیدارەی گەرمیان هەمیشە دەرگای واڵایە، پشتیوان و هاوکارتان دەبێت بۆ پەرەپیدانی کاری رێکخراوەییتان بۆ خزمەتی سەرجەم خاوەن پێداویستییەتایبەتەکان لە گەرمیان.