بەروار: 28/08/2025
لەسەر فەرمانی بەڕێز(قوباد تاڵەبانی) جێگری سەرۆکی ئەنجومەنی وەزیران زەوی بەسەر ڕاگیراوانی ئەنفالی ناحیەی سەرقەڵا دابەشکرا. ئەمڕۆ (٢٨ی ئاب) لە مەراسیمێکدا بە ئامادەبوونی جەلال شێخ نوری سەرپەرشتیاری ئیدارەی گەرمیان و قایمقامی قەزای کەلار و بەڕێوەبەری گشتی شارەوانییەکانی گەرمیان و ڕێکخراوەکانی بواری ئەنفال و جینۆساید و ژمارەیەک لە بەڕێوەبەری دامودەزگاکانی ناحیەی رزگاری و سەرقەڵا و ڕاگیراوانی ئەنفال، ٦٤ پارچە زەوی بەسەر سودمەندبووانی ناحیەی سەرقەڵا کە ڕاگیراوی ئەنفالن دابەشکرا. لەمەراسیمەکەدا، جەلال شێخ نوری سەرپەرشتیاری ئیدارەی گەرمیان، رایگەیاند، خۆشحاڵین ئەمڕۆ راگیراوانی ئەنفالی ناحیەی سەرقەڵا کە سودمەندبوون لە فەرمانی وەرگرتنی زەوی کە ساڵی ٢٠١٨ لەلایەن بەڕێز قوباد تاڵەبانی جێگری سەرۆکی ئەنجومەنی وەزیرانەوە دەرچووە بۆ نزیکەی ٢ هەزار و ٤٠٠ سەد کەس لە گەرمیان بۆ وەرگرتنی زەوی. ووتیشی، لەماوەی ساڵانی رابردوودا، بەهۆی نەبونی زەوی لە سنوری شارەوانی و کێشەی شوێنی نیشتەجێبوون لە فەرمانەکە و لەبەرچاوگرتنی داخوازی سودمەنبوانی سەرقەڵا، پرۆسەی دابەشکردنی زەوی دواکەوت، بەڵام خۆشحاڵین ئەمڕۆ کۆتا وەجبەی سودمەنبوان زەوی وەردەگرن. سەرپەرشتیاری ئیدارەی گەرمیان، سوپاسی بەڕێز قوباد تاڵەبانی جێگری سەرۆکی ئەنجومەنی وەزیرانی کرد لەبەرامبەر دەرکردنی فەرمانی پێدانی زەوی و چارەسەرکردنی سەرجەم کێشەو گرفتەکانی بەردەم پرۆسەکە. هاوکات، سوپاسی وەزیری کشتوکاڵ و رێکخراوەکانی بواری جینۆساید و بەڕێوەبەرایەتیە گشتییەکانی شارەوانیەکانی گەرمیان و کشتوکاڵی گەرمیان و کاروباری شەهیدان و ئەنفالکراوانی گەرمیان و یەکە ئیدارییەکان و بەڕێوەبەرایەتی تۆماری خانوبەری گەرمیان و شارەوانی کەلار و کفری و رزگاری و سەرقەڵا و هەموو ئەو دامودەزگایانە کرد رۆڵیان هەبوو لە سەرخستنی پرۆسەکە. دابەشکردنی ئەم زەوییانە کۆتا قۆناغی دابەشکردنی زەوی بوو کە بە فەرمانی بەڕێز قوباد تاڵەبانی جێگری سەرۆکی ئەنجومەنی وەزیران، لە ساڵی ٢٠١٨ بڕیاری دابەشکردنی دوو هەزار و ٣٨٩ پارچە زەوی بەسەر کەسوکاری سەربەرزی ئەنفالکراوان و شەهیدان و زیندانیانی سیاسی و راگیراوانی ئەنفالی گەرمیان دراوە، پرۆسەکەش بەسەرپەرشتی ئیدارەی گەرمیان لەلایەن بەڕێوەبەرایەتی گشتی شارەوانیەکانی گەرمیان و شارەوانی کەلار بەڕێوەچووە. جێگەی ئاماژەپێدانە، لەماوەی رابردوودا، سودمەندبوانی دانیشتووی ناحیەی سەرقەڵا لە بەر کەمی بەهای زەوی لە ناحیەکەیان داوایان کرد لە ناحیەی رزگاری زەوییەکانیان پێبدرێت، لای خۆیەوە جەلال شێخ سەرپەرشتیاری ئیدارەی گەرمیان داواکارییەکانی گەیاندە ئەنجومەنی وەزیران دواتر لەلایەن ئیدارەی گەرمیان و بەڕێوەبەرایەتی گشتی شارەوانیەکانی گەرمیان و دامودەزگا پەیوەندیدارەکانی تر رێکاری پێویست گیرایە بەر و لە ناحیەی رزگاری زەوی شایستەیان پێدرا.