پەیامی سەرپەرشتیاری ئیدارەی گەرمیان لەیادی کۆچی دوایی سەرۆک مام جەلال

بەروار: 02/10/2025

لەیادی ٨ ساڵەی کۆچی دوایی رابەری نەتەوەیی گەلی کورد سەرۆک مام جەلال، سەری رێز و وەفا بۆ روحی پاکی دادەنەوێنین، سەرۆک مام جەلال سەرکردە و سیاسەتمەدارێکی گەورە و خاوەن ئەزموونی گەلی کورد بوو، کە بە خەبات و تێکۆشانی دەیان ساڵەی خزمەتێکی گەورەی بە کورد و کوردستان کرد.

سەرۆک مام جەلال لە ژیانی سیاسیدا رۆڵی گەورە و بێهاوتای هەبوو لە بەدیهاێنانی خەونی لە مێژینەی گەلی کورد بۆ ئازادی و پاراستنی سەروەریمان، هەر لە سایەی سیاسەتی حەکیمانەی سەرۆک مام جەلال ئاشتی و پێکەوەژیانی سیاسی و نەتەوەیی لە هەرێمی کوردستان و عێراق بەدیهات، بۆیە لەدەستدانی ئەم سەرۆک و سەرکردە مەزنە خەسارەتێکی گەورە بوو بۆ گەلی کورد و عێراق و ناوچەکە بە گشتی و هەرگیز جێگەی پڕنابێتەوە.

هیواخوازین لەساڵیادی ماڵئاواییکردیدا، هەموولایەک سیاسەت و رێبازی سەرۆک مام جەلال کە یەکڕیزی و پێکەوەیی نیشتمانی بوو، بکەن بە هەوێنی سیاسەتی گەلی کورد لە پێناو پاراستنی دەستکەوتەکان و بەدیهێنانی یەکڕیزی نێوماڵی کورد.

 دووبارە لە ساڵیادی کۆچی دوایی سەرۆک مام جەلال، سەری رێز و وەفاداری دادەنوێنین و رەوانی شاد و ئارام بێت.

جەلال شێخ نوری 
سەرپەرشتیاری ئیدارەی گەرمیان