بەروار: 20/11/2025
بەئامادەبوونی سەرپەرشتیاری ئیدارەی گەرمیان فستیڤاڵی بازاڕ لە قەزای کەلار دەستی پێکرد
ئەمڕۆ بە ئامادەبوونی سەرپەرشتیاری ئیدارەی گەرمیان و جێگری سەرپەرشتیار بۆ کاروباری هونەری و بە سەرپەرشتی قایمقامی قەزای کەلار و بەرێوەبەری گشتی گەشتوگوزاری گەرمیان و بەڕێوەبەری چاودێری بازرگانی گەرمیان و ئامادەکارانی فستیڤالەکە و بەشێک لە هاوڵاتیان ،لە لایەن بەڕێوەبەرایەتی گشتی گەشتوگوزاری گەرمیانەوە، فستیڤالی بازاڕ لەقەزای کەلار کرایەوە.
سەرپەرشتیاری ئیدارەی گەرمیان دوای کردنەوەی فستیڤاڵەکە، کاسبکارانی بەسەرکردەوەو دەستخۆشی لە ئامادەکارانی فستیڤاڵەکە کرد ، هیوای خواست فستیڤاڵی بازاڕ جوڵەیەکی باشی بازاڕ بێت و پڕ خێر و خۆشی بێت بۆ خەڵکی گەرمیان و هەموو کاسبکاران.
قایمقامیەتی قەزای کەلار و بەڕێوەبەرایەتی گشتی گەشتوگوزاری گەرمیان بۆ ئەو مەبەستە ڕێکارە پێویستەکانیان گرتووەتە بەر، لەڕووی ئەمنی و ئاسانکاری بۆ گەشتیاران. فستیڤاڵی بازاڕ لەقەزای کەلار بەبەشداری ٢٠٠ خاوەنکار و کاسبکاری گەرمیان و دەرەوەی گەرمیان لە ڕێکەوتی ٢٠ی ١١ بۆ ٢٤ی ١١ بەردەوام دەبێت و کاسبکاران و شوێنکاران پێشوازی لەهاوڵاتیان ئەکەن.