بەروار: 23/11/2025
ئەمڕۆ (٢٣ی تشرینی دووەمی ٢٠٢٥) بەئامادەبوونی سەرپەرشتیاری ئیدارەی گەرمیان و جێگرانی سەرپەرشتیار و ژمارەیەک لە بەڕێوەبەری گشتی و بەرپرسی دامودەزگاکان و کەسوکاری شەهیدان و ئەنفالکراوان و هاوڵاتیانی سنورەکە، لەدوای دەرچوونی فەرمانی بەقەزابوونی، قایمقامیەتی قەزای رزگاری کرایەوە. لەمەراسیمەکەدا، بەڕێز جەلال شێخ نوری سەرپەرشتیاری ئیدارەی گەرمیان، ووتارێکی پێشکەشکرد و تیایدا باسی لەمێژووی قوربانیدانی رزگاری کرد و راشیگەیاند، لە رێکەوتی ٢٠٢٥/٦/٢٢ سەردانی ناحیەی رزگاریمان کرد و بەفەرمی ئەوەمان راگەیاند کە وەک پاداشتێک بۆ کەسوکاری شەهیدان و ئەنفالکراوان، پێویستە رزگاری بکرێت بە قەزا.
راشیگەیاند، بۆ ئەو مەبەستە گفتوگمان لەگەڵ بەڕێز کاک قوباد تاڵەبانى جێگری سەرۆکی ئەنجومەنی وەزیران کرد و پاش رەزامەنی بەڕێزیان لە ٢٠٢٥/٦/٣٠ نوسراومان ئاڕاستەی نوسینگەی جێگری سەرۆکی ئەنجومەنی وەزیران کرد دواتر داواکاریەکەمان بردە ئەنجومەنی وەزیران و پاشان هەنگاوەکانی بەقەزابوونی ناحیەی رزگاری گیرایەبەر و فەرمانی بەقەزابوونی رزگاری لەلایەن ئەنجومەنی وەزیران و سەرۆکایەتی هەرێم دەرچوو.
ووتیشی، لەگەڵ دەرچوونی فەرمانەکە پێمان باش بوو کاک جەمالی شەهید مام صاڵح کە پێشتر بەڕێوەبەری ناحیەی رزگاری بووە و ئەزموونى باشى هەیە لە قەزاکە، بکرێت بە قایمقامی قەزاى رزگارى.
ووتیشی، خۆمان بە خۆشحاڵ ئەزانین ئەمڕۆ قایمقامیەتی قەزای رزگاری دەکەینەوە و دەبێتە قەزایەکی نوێ لە ئیدارەی گەرمیان و دامودەزگاکانی حکومەت لە سنورەکە هاوکار و پشتیوان دەبێت بۆ خزمەتکردنی زیاترى قەزاکە.
دواتر لەلایەن سەرپەرشتیاری ئیدارەی گەرمیانەوە فەرمانی دەستبەکاربوون پێشکەش بە قایمقامی قەزای رزگاری کرا و جەمال صالح قایمقامى قەزاى رزگارى یەکەمین ووتووتارى پێشکەشکرد، تیایدا تیشکى خستەسەر قۆناغەکانى گەشەکردنى رزگارى لە ئۆردوگایەکى زۆرەملێ بۆ ناحیە و دواتر قەزا. هاوکات باسى لە هەنگاوى سەرەتاى بەقەزاکردنى رزگارى کرد کە لە دواى سەردانى سەرپەرشتیارى ئیدارەى گەرمیان بۆ ناحیەى رزگارى ئەو کات هاتووە و دواتر هەنگاوەکانى بە قەزابوونى رزگارى گیراوە بەر.