بەروار: 30/11/2025
ئەمڕۆ (٣٠ى تشرینى دووەمى ٢٠٢٥) لە مەراسیمێکدا، بە ئامادەبوونى سەرپەرشتیارى ئیدارەى گەرمیان و قایمقامى قەزاى کەلار و قایمقامى قەزاى رزگارى و ژمارەیەک لە بەڕێوەبەرە گشتییەکان و بەرپرسانى پەروەردە و مامۆستایان و سەرپەرشتیارانى پەروەردەیی، بەڕێوەبەرى گشتى پەروەردەى گەرمیان دەستبەکاربوو.
لەمەراسیمەکەدا، بەڕێز سەرپەرشتیارى ئیدارەى گەرمیان، تیشکى خستەسەر گرنگى رۆڵى پەروەردە و سوپاسى (م. دارا ئەحمەد، بەڕێوەبەرى گشتى پەروەردەى گەرمیان)ى کرد کە لە ماوەى ١٣ ساڵی ڕابردوودا وەک بەڕێوەبەرى گشتى پەروەردەى گەرمیان خزمەتى کردووە و جێگەى دەستى دیار بووە ، هاوکات سوپاس و دەستخۆشى ئاراستەى م. عەدنان حسێن کرد کە لە دواى خانەنشینبوونى بەڕێوبەرى گشتى ماوەى نزیکەى ساڵێک بە وەکالەت بەڕێوەبەرى گشتى پەروەردەى گەرمیانى بەڕێوەبرد و کارەکانى بە باشى رایبیکرد.
ووتیشى، پیرۆزبایی ئاراستەى (م. محمد احمد ئیبراهیم) دەکەین کە ئەمڕۆ وەک بەڕێوەبەرى گشتى پەروەردەى گەرمیان دەستبەکار دەبێت و هیواى سەرکەوتنى بۆ دەخوازین، لەگەڵ ئەوەشدا هاوکار و پشتیوانى دەبین تا بتوانێت کارەکانى بەباشى رایی بکات و خزمەت بە بوارى پەروەردە بکات.
دواتر،م. دارا ئەحمەد، بەڕێوەبەرى گشتى پێشووى پەروەردەى گەرمیان لە ووتەیەکیدا باسى لە رەوشى پەروەردە کرد و سوپاسى ئیدارەى گەرمیان و دامودەزگاکانى سنورەکەی کرد کە هاوکار و پشتیوانى بوون.
لە دواى وەرگرتنى فەرمانى دەستبەکاربوونى (م. محمد احمد ئیبراهیم) بەڕێوەبەرى گشتى پەروەردەى گەرمیان ووتەیەکى پێشکەشکرد و تیایدا بەگرنگەوە لە ڕۆڵی سەرپەرشتیاران و مامۆستایان کرد لە ماوەی ڕابردوودا و هیوای خواست پشتیوان و هاوکاری بن بۆ زیاتر بەرەوپێشبردنی کەرتی پەروەردە لە گەرمیان.